Ostiraletan soilik, Txintxarri berritua

Tokikom euskarazko tokiko hedabideen elkartearekin batera abiatutako gogoetan ostiraletako argitalpenak irakurrienak zirela ondorioztatu zen. Tartean, Goienak diseinu lanak elkarbanatu ditu aldaketa erraztuz. Edukiei dagokionez, aldaketak nabarituko dira. Orain arteko erreportaje eta elkarrizketak modu erakargarriagoan eskaintzeaz gain, mamia sakonago lantzea da helburua. Bestalde, formatu berrira aldaketa egiteko arrazoi nagusietako bat izan da kirolari tarte gehiago eskaintzea. «Kirol orri bakarra izan dugu orain arte eta tarteka elkarrizketa edo erreportaje bat edo beste sartzeko orri gehiago eskaintzen ziren. Herrian dagoen zaletasuna eta kirol aniztasuna ikusita, gehiago behar zela argi genuen». Iritzia ematen duen kolaboratzaile taldearekin «lanean jarraituko dugu eta kultura eta kirol ekitaldien agenda ere mantenduko da. Urtean zeharreko 32 orriko zenbaki bereziak argitaratuko dira, jaietako bi zenbaki bereziak, Gabonetakoa eta Urtekaria». Zorion-agurrak, azoka txikia, herritarren txokoa atalak mantenduko dira eta berrikuntza modura eskelak edota oroigarriak txertatzeko aukera izango da paperean eta sarean.