Diario Vasco

Ikastolen ikasturtea ofizialki hastear dago

Oronan izango da ikastolen ikasturte berriaren hasiera ekitaldia.
Oronan izango da ikastolen ikasturte berriaren hasiera ekitaldia. / JUANFER
  • Larunbat honetan, irailaren 24an, goizeko 11:00etan, ikastolek 2016-17 ikasturtearen hasiera ekitaldia ospatuko dute Hernaniko Orona Ideo Fundazioan

Larunbat honetan, irailaren 24an, ikastolek 2016-17 ikasturtearen hasiera ekitaldia ospatuko dute Hernaniko Orona Ideo Fundazioan. Ekitaldia goizeko 11:00etan izango da, eta ordubete inguru iraungo du. Horren ostean, otamen txiki bat izango da bertaratzen direnentzat.

‘Berritzen, hobetzeko’ lelotzat hartuta egingo da ekitaldia, eta bertan azalduko dira ikastolak, etapaz etapa, aurrera eramaten ari diren berrikuntza pedagogiko nagusiak.

Aurten 'Ikastola' aldizkariak 25 urte bete ditu lehen zenbakia argitaratu zuela. Hori ere gogoraraziko da ikasturte hasierako ekitaldian.

Joan den ikasturte amaieran berritu ziren Artezkaritza Batzordea eta Zuzendaritza Taldea ere aurkeztuko dira.

Ohi bezala, Ikastolen Elkarteko lehendakari Koldo Tellitu jaunak ikasturte honetarako ikastolek dituzten helburu eta erronken berri emango du.

Agintari, herri ordezkari, politikari, sindikatuetako kide, gizarte eta kultura eragileetako ordezkariak gonbidatuak izan dira ekitaldira, eta hitza hartuko dute Eusko Jaurlaritzako Hezkuntza, Hizkuntza Politika eta Kultura sailburu Cristina Uriarte andereak, Gipuzkoako Foru Aldundiko Gobernantza eta Komunikazio diputatu Imanol Lasa jaunak, eta Hernaniko alkate Luis Intxauspe jaunak.

Temas