Diario Vasco

Egape Ikastola gaur hasiko da bere 50. urteurrena ospatzen

Ikasleek jaialdi bat eskainiko dute eta bertan Urnietako udal ordezkariak izango dira.
Ikasleek jaialdi bat eskainiko dute eta bertan Urnietako udal ordezkariak izango dira.
  • Egungo ikasleak izango dira protagonista, baina omenalditxo bat eskainiko zaie Ikastolaren sortzaileei

Hasi berri den ikasturtea ez da nolanahikoa Egape ikastolarentzat. Izan ere, duela 50 urte urnietar talde ekimentsu batek gaur egungo ikastetxearen haziak jarri zituen. Sortzaileen artean Maria Arizmendi, Sabina Arruarte, Xabier Larretxea, Benantxio Laskibar eta Anselmo Unanueren izenak nabarmentzen dira. Beraiek osatu zuten Ikastolako lehen batzordea eta gaurdaino datorren bidea ireki zuten. Bide horren hasiera ez zen batere erraza izan, baina poliki-poliki eta urnietar askoren inplikazioarekin lan izugarria eginez, bide hori luza-tzen eta zabaltzen joan zen.

Ikastolak eraldaketa sakona jasan du bere sorreratik: instalazioetan, ekipamenduan, baliabideetan, baliabideen kudeaketan, barne egituran, jabegoan, antolaketan edo pedagogia arloan, besteak beste.

Ikastolaren 50 urteko historian ikasle eta irakasle asko pasatu dira bere geletatik, hasierakoak egoera behartsuagoan, gerokoak askoz hobeto, eta gaur egungoak hezkuntza sistemak eskaintzen dituen abantaila guztiekin. Urte hauetan zehar Ikastolaren proiektua egokitzen eta eguneratzen joan da, une ezberdinetan gizarteak planteatu dizkion eskaerei modu hoberenean eran-tzuteko.

Aurtengoa ospakizun urtea izango da Egape ikastolarentzat eta ikasturtean zehar garatzen joango diren hainbat egitaraua diseinatu dituzte Udalaren laguntzaz.

Urteurrenaren hasierako ekitaldia gaur, ostiralean, izango da eguerdiko 12:00etan Lehen Hezkuntzako instalazioetan. Bertara Hezkun-tza Saileko eta Udaleko ordezkariak joango dira, hezkuntza esparruko beste hainbat eragilerekin batera. Patioan garatuko den ekitaldi horretan ikasleak izango dira protagonista eta Ikastolaren sortzaileei omenalditxo bat eskainiko zaie. Ekitaldia irekita egongo da hurbildu nahi duten guztiontzat.

Irailean aurrera eramango diren beste ekitaldi batzuk hauek dira: Kantujira, bihar, larunbata, eta Euskal karaokea, Samieletan. Urrian berriz, Aitziber Salinasek 50. urteurrenaren liburuxka aurkeztuko du. Era berean hitzaldiak, mahai inguruak, erakusketak, antzerki emanaldiak, etab. antolatuko dituzte.

Trafiko mozketa

Kantujira ospatzearen eraginez, Idiazabal kalean trafiko mozketa izango da bihar, larunbatean, goizeko 11:30etik arratsaldeko 13:30era. Errepide mozketa horien ondorioz, Garayar konpainiaren autobusak herrigunean geldialdi bakarra egingo du, hain zuzen, zaharren egoitzako biribilgunean (Andoaineko norabidean).