Azaro kulturalaren baitan ekitaldi ugari Goizuetan

Nafarroako bertsolari gazteak lehen fasean zortziko handian, zor-tziko txikian eta puntu-erantzunean aritu ziren. Alazne Untxalo eta Saioa Alkaizak lortu zituzten puntuaziorik altuenak eta buruz-burukora pasa ziren. Kopletako saioa zein bakarkako ariketa amaitu ostean, Zuriñe Lujanbio Goizuetako zinegotziak jantzi zion txapela Untxalori.

Larunbatean berriz, Azaro kulturalaren baitan, Leitzako Jeiki Abesbatzak emanaldia eskaini zuen elizan. Kanta sorta bikaina prestatu zuten leitzarrek Goizuetako saiorako eta giro ezin hobean primerako emanaldia eskaini zuten maila oso ona erakutsiz. Nekane Piñuela aritu zen zuzendari lanetan larunbateko saioan. Txalo zaparrada bikaina jaso zuten Jeiki abesbatzeko kideek amaitutakoan. Gogoan izan behar da, Leitzako abesbatzak iaz 40 urte bete zituela kantu munduan eta ospakizun berezi honen baitan, saio desberdinak izan zituela urteurren berezian. Esaterako, Mozarten Requiema eskaini zuten.

Igandean, 'Difret' filma ikusi ahal izan zen Ganbaran.

Azken txanpa

Azaro kulturalaren azken hitzorduak izango dira datorren asteburuan. Ostiralean, hilaren 27an, 'Amama' filma ikusteko aukera izanen da Ganbaran 19:00etan. Sarrera 2 euro kobratuko da. Larunbatean, berriz, hitzordu garrantzitsua izango da Goizuetan. Azoka eguna izango da eta beste behin ere artisau, nekazaritza eta azienda erakusketa egingo da herriko erdigunean eta Txino auzoaren pilotaleku inguruan.