Parte hartze prozesua burutzea proposatu du EH Bilduk portua eta Kofradia Zaharraren inguruan

Duela gutxi Kofradi-Zaharrean agertu zen pankarta. / A.G.
Duela gutxi Kofradi-Zaharrean agertu zen pankarta. / A.G.

Hurrengo osoko bilkuran aurkeztuko dituzte bi mozioak

GORRITIBEREA MUTRIKU.

Kofradi-Zaharra eraikuntzaren geroaz eta portuko obren amaieraz bi mozio prestatu eta aurkeztu ditu Mutrikuko Udaleko EH Bilduko taldeak, bietan ere prozesu parte hartzaile bat proposatzen dutelarik irtenbide bezala, zaborren gaian burutu zen bezalaxe.

Hasiera batean, azaroko osoko bilkuran aztertzea proposatzen zuten, baina plenoa bertan behera gelditu zenez, abendukoan aztertzea aurreikusten dute. Joan zen otsailaren 4an erre zen Kofradi-Zaharra eraikuntzarekiko, herritar eta marinelek eginiko ekarpen handia duen altxorra dela aitortu ondoren, bi asmo, bi proiektu edo eta bi ikuspuntu ikusten dituzte; batetik Eusko Jaurlaritzak sutea baino lehen zeukana, nolabait ostalaritzara zuzenduta, eta bestetik sortu berria den Kofradia Zaharraren Lagunak izeneko elkarteak proposatzen duena.

Gauzak horrela, Jaurlaritzak 2018. urterako prestatu dituen aurrekontuetan, 200.000 euro aurreikusten omen ditu Kofradia berritzeko proiektua idazteko, baina guzti horren aurrean hausnarketa xume bat egitea proposatzen dute aurretik, batik bat Mutrikuk portuarekiko eta bereziki Kofradi Zaharrareriko barneratuta daukan sentimentua hain indartsua izanik, herritarren ahotsa eta nahia kontutan hartu eta parte hartzearen bidez demokrazian sakontzea izango omen delakoan sendagairik eraginkorrena.

Gauzak horrela bost puntutan zehar prozesu erabakitzailea bultza eta sustatzea proposatzen dute; gehiengoa jasotzen duen proiektua izan dadin Udalak, Jaurlaritzaren aurrean defendatuko duena, eta horretarako eskatzen dutena da, datozen hilabetetan Udalak prozesu hori martxan egoki jartzeko lantalde anitza, alderdi eta eragile desberdinekin osatutakoa sortzea, eta azkenik Udaleko aurrekontuei atxikita, prozesu hauetan aditua den enpresaren bat kontratatzea.

Portuaren amaiera

Portuaren amaieran berdin jokatzea proposatzen dute, duela bi urte herri-galdeketarako zegoen nahi kolektiboa berreskuratu eta behingoz Mutrikuko herriak gai honen inguruan erabakia har dezan. Nola nahi mozioaren aurrekarietan diote Jaurlaritzak 2018. urteko aurrekontuetan 'Mutrikuko babes-dikerako' 400.000 euro esleitu dituela, baina zehazki zein erabilpen eman nahi dioten kopuru horri jakin nahi dute, izan ere Portuetako Memorian honakoa irakurri bai daiteke: «2018ko ekitaldiaren helburu nagusia Mutrikuko portuko babeserako kai-muturraren azken 100 metroak amaitzeko obra gauzatzea izango da. Horrela, itsasoko sarbidea hobetzeko eta portuan irabiaketa baldintza egokiak lortzeko jarduketak amaituko dira. Jarduketa hori esker, behar den babeslekua emango zaio azken urteotan kirol jarduerarako berrantolatu den barneko kaiari, pantalanak instalatuta».

Contenido Patrocinado

Fotos

Vídeos