Motxaila eguna gaur zortzi egingo da

Urtetik urtera indar gehiago hartzen ari den eguna da

AMAGOIA ZABALA MENDARO.

Gaur zortzi, hau da, datorren zapatuan Motxaila eguna ospatuko da herrian. Motxaila taldeak antolatzen duen ekintza da Udalaren laguntzarekin. Datorrenarekin 13. edizioa beteko da eta urtetik urtera indar gehiago hartzen ari den eguna edo astebukaera dela esan daiteke, izan ere, aurreko egunean, ostiral gauean, Motxaila bertsotan ospatzen da eta hurrengo eguna da Motxaila egunaren egunik indartsuena. Motxaila bertsotara joateko aurrez tiketak erosi behar dira eta hauek Morroskilo eta Txirristaka tabernan daude.

Goizeko 9:00etan Aitzbeltz kobara joateko irteera izango da. Bidea eta kobazuloa ezagutzen ez dutenek aukera paregabea daukate bertara joateko. Irteera Garagartza auzoan dagoen San Agustin kultur gunetik izango da

Kobazuloan, 'jaialdi magikoa' egingo dela aurreratu dute antolatzaileek. Eguerdian, 14:00ak aldera, Gaztetxean, bazkari herrikoia eskainiko da. Aurrez tiketak erosi behar dira eta bihar izango da tiketak erosteko azken eguna. Tiketak, Aitzbeltz tabernan eros daitezke.

Bazkalostean, arratsalde pasa bikaina izango dute, abestiak, pailazoak... izango direlarik eta poteo herrikoiarekin hasi aurretik, arratsaldeko 17:00ak aldera, herriko Jo ta Ito punk-rock talde gazteak kontziertua eskainiko du, bertara hurbiltzen direnen buruak eta gorputzak mugiarazteko asmoz.

Futbol partidak

Gaur goizeko 9:50ean hasita futbol partida ezberdinak ikusteko aukera izango dugu. Ikastolako Benjamin taldekoek, bai neska taldeak eta bai mutilek ere, Mutriku eta Debatik etorriko diren taldeen aurka arituko dira. Partidu hauek eskola kirola programaren barne daude eta Ikastolako patioan jokatuko dira. Alebinetako 4 taldeak kanpora joango dira: nesken taldea Errotazar futbol zelaira eta mutilak San Miguel futbol zelaira, Deba eta Mutrikuarren aurka jokatzera.

Pilota partidak

Arratsaldean berriz, 17:00etatik aurrera, bigarren faseko eskolarteko esku pilotako lau partida jokatuko dira Goñatin. Gaurkoan, Mendaro pelota eskolako bi gaztetxo arituko dira, Deba eta Bergaratik etorriko direnen aurka. Bestalde, beste bi debatar gaztek, Bergara eta Soraluzetik etorriko diren beste bi pilotarien aurka jokatu beharko dute.

Contenido Patrocinado

Fotos

Vídeos