Larunbatean giro alaia espero da herrian Euskal Jaiarekin

Marmitako lehiaketan parte hartu nahi dutenek gaur dute azken eguna izena emateko. / A.S.
Marmitako lehiaketan parte hartu nahi dutenek gaur dute azken eguna izena emateko. / A.S.

Marmitako lehiaketan izena emateko epea gaur bukatuko da

ANDER SALEGI DEBA.

Urtero bezala, iraileko azken larunbatean, Debako herrian Euskal Jaia ospatzen da. Beste urte batez, Zuhatza Euskara Elkarteak Debako Udalarekin batera antolatu du ekintzez betetako eguna. Jai batzordeak egun horretan baserritarrez janztea eskatzen du, giro ona sortzeko asmoarekin. Musika, dantzak, taloak, bazkari herrikoia, marmitako lehiaketa eta erromeria izango dira nagusi egun honetan. Egitarau zabal bat antolatu da Euskal Jaia ospatzeko eta horretarako ekintzak ez dira larunbatean bakarrik egongo. Bihar, Kalean Kantuz martxan jarriko du egitaraua herriko kaleak alaituz 19:00etatik aurrera.

Hurrengo egunean, larunbata, egun handia ospatuko da eta oso goizetik Debako biztanleek talo goxoak dastatzeko aukera edukiko dute. Ordu berdinean, 10:00etan, antolakuntzakoek mahiak ezarriko dituzte marmitako lehiaketan parte hartuko duten parte hartzaileentzat, aurten marmitakoa ez da Simon Berasaluze plazan egingo, plaza Zaharrean baizik. Zuhatza Euskara Elkarteak, marmitako lehiaketaren zazpigarren edizioa antolatu du. Parte hartu ahal izateko aurrez izena eman beharko da turismo bulegoan. Izena emateko epea gaur, osteguna, bukatzen da. Parte hartzaile bakoitza sua, kazuelak, atuna, patata, etab eraman beharko du. 14:30ean marmitako plater bat aurkeztu beharko da, prestatu duten toki berean. Eguraldi txarra egiten badu, lehiaketa estalitako pasealekuan izango da. Sari banaketa, bazkal ostean egingo da Aldats pilotalekuan. 12:30ean dantzari eta dultzaineroen unea iritsiko da, Gure Kai Dantza taldea eta Musika Eskolako dantzariak kalez kale ibiliko dira. 13:00etan, musika eta dantzen erakustaldi bat egingo da.

Bazkari herrikoia 15:00etatik aurrera, Aldats pilotalekuan izango da. Bertan 700 lagunentzako tokia egongo da. Platerak eta mahi tresnak antolakuntzak jarriko ditu, baina norberak bere bazkaria eraman beharko du. Txotx edalontzia salduko da bost euroren truke eta sagardoa nahi beste izango da. Kafea eta kopak hartzeko aukera eskainiko du Zuhatza Euskara Elkartea. Boluntarioak beharko dira egun honetan ekintzak burutu ahal izateko, 9:30ean mahiak jarri eta antolatzeko. Koadrila bakoitzetik kide bat hurbiltzea eskatzen dute antolakuntzatik. 11:30etik aurrera soilik hartu ahal izango da lekua bazkarian.

Basajaun erromeria taldea arduratuko da egun honi azken jai giroa ematen, horretarako 20:00etan eta ondoren 23:00etan dantza egiteko aukera eskainiko dute berain musikarekin.

Contenido Patrocinado

Fotos

Vídeos