Gazteek giro ona jarri zuten Kopraixetako azken egunean

Gazteak kalejiran plazara Jan da Eran txarangaren doinuekin batera. / ARGAZKIAK ANDER SALEGI
Gazteak kalejiran plazara Jan da Eran txarangaren doinuekin batera. / ARGAZKIAK ANDER SALEGI

Arnaitz Garatek irabazi zuen bizikleta karrera

ANDER SALEGI DEBA.

Itziarko jaiak amaitu dira hasi ziren bezala, euripean. Ekin-tzez betetako bost egun eder pasa dituzte itziartarrek, eta dagoeneko musikaz, dantzaz, zezenez, kirolez eta jolasez berriz gozatzeko beste urte bat itxaron beharko dute.

Gazteak arduratu ziren atzo aurtengo jaien egitaraua ixteaz. Eguna puzgarriekin hasi zen, Zabalsoroko frontoian umeek primeran pasa zuten puzgarrietan saltoka. Ondoren gazteak testigua hartu zuten eta beraien eguna ospatzen hasi ziren. Lehendabiziko ekintza, ohitura denez, bizikleta karrera izan zen. 9 txirrindulari parte hartu zuten, batzuk mendiko bizikletarekin eta beste batzuk errepidekoarekin. Arnaitz Garate izan zen lehena muga zeharkatzen. Garaileak, bazkari edo afari bat Kanala jatetxean bi pertsonentzako irabazi zuen. Zirkuituari bost buelta eman eta gero Arnaitzek gutxirengatik irabazi zion Lukeneri. Aurtengo bizikleta karreran gazte askok parte hartu zuten eta gainera helduak baino gehiago izan ziren.

Jarraian, koadrilak Burugorrin elkartu ziren eta bertan hasi ziren poteoarekin. Bitartean, jolasak egiten hasi ziren paella txapelketarako osagaiak lortzeko nahiarekin. Lehendabizi, bizikleta karrera baten antzekoa egin zuten, ondoren txapel jaurtiketa, bertso batzuk osatu zituzten eta azkenik toka jokoari ekin zioten, denbora guztian Jan da Eran txaranga giroa alaitzen zegoelarik. Eguerdian Leizarranek bere zezenak atera zituen herriko plazara, baino soilik gutxi batzuk ausartu ziren zezenaren aurrean jartzera. Hala ere atera zirenek zezenen gainetik salto egitea lortu zuten.

Zezenak eta gero, koadrilak sukaldaritza lanetan hasi ziren paella egiteko asmoz eta bakoitzak jokoetan lortutako osagaiak erabili behar izan zituen. Arratsaldean, kalejira baten bitartez, plazara gerturatu ziren koadrila guztiak beraien-tzat antolatutako jokoetan parte hartzeko asmoz. Aurreskua eta zezenak ez ziren falta arratsaldeko ekintzetan.

Gauean dantzatzeko aukera paregabea egon zen Huntza taldeak eskainitako kontzertuarekin eta Lehian taldeak eskainitako berbenarekin. Lotsa gutxi zutenak jendearen aurrean abesteko, playback txapelketan parte hartu zuten.

Jaiak amaitu dira Itziarren, baina Deban astelehenean hasiko dira txupinazoarekin. Aurretik, igandean aizkolariak eta desenkajonamientoa ikusteko aukera egongo da zezen plazan. Debarrak, bost egun edukiko dituzte beraien festaz gozatzeko, itziartarrak berriz urte bat itxaron beharko dute Kopraixak berriz ospatu ahal izateko.

Dantza ikastaroak

Debako Gure Kai dantza taldeak San Roke festetan egingo diren dantzen (San Roke, Kaskarots, Jorraidantza, etab) ikastaroa eskainiko du parte hartu nahi duen edonorentzat. Horretarako gaur 19:00etan Agirre jauregiko dantza gelan bilduko dira.

Fotos

Vídeos