Ekintza ugari antolatu dira Euskararen egunaren baitan

Euskaraokeak jende ugari bilduko du gaztelekuan. /  ANDER SALEGI
Euskaraokeak jende ugari bilduko du gaztelekuan. / ANDER SALEGI

Gaur mahai-inguru bat egingo da bertsolaritzari buruz

ANDER SALEGI DEBA.

Euskararen Nazioarteko Eguna igande honetan izango da, abenduaren 3an. Deban, beste herri askotan bezala ekintza ezberdinak antolatu dituzte. Gaurtik igandera bitartean adin guztietako pertsonei zuzendutako ekintzak antolatu dituzte Debako Udalak, hainbat elkarteen laguntzarekin.

Abenduaren 17an BECen izango den bertsolari txapelketa nagusia dela eta, mahai-inguru berezi bat egingo da Deban. Gaur 18:00etan Kultur Elkartean 'Bertso txapelketako entzuleak prestatzen' izenburuarekin ospatuko da solasaldi hau. Txapelketa nola eta zer puntuatzen den, zer baloratzen, zer penalizatzen nolako amaierak, arrazoiak eta galdera gehiago erantzungo dira. Mikel Aizpurua gidatuko du saioa. Mahai-inguru formatua izango du. Bertsolariak, zaleak etab. arituko dira solasaldian eta bertara gerturatzen direnak baita ere izango dute aukera norbere ekarpenak edo zalantzak plazaratzeko. Txapelketan kantatutako zenbait bertso aztertuko dira ere Zuhatza Euskara Elkarteak antolatutako mahi-inguru honetan.

Bihar Debako gaztetxean helduei zuzendutako antzerki bat eskainiko da 21:30etik aurrera. Iñaki Ziarrusta aktoreak 'Bihotz salataria' Edgar Allan Poeren itzulpen bat interpretatuko du. Obraren iraupena 45 minutukoa izango da eta sarrera doan. Zoroaren argudioak, psikopataren perfekzionismoa, hiltzaile zuhurra eta zorrotza, delitu ikaragarriena, zitalena babes gabeko agurea akabatu du, polizia ikertzera dator, hauxe izango litzateke antzerkiaren laburpen bat.

Larunbat arratsaldez udaletxeko plazan 'Gozatu Euskara Ahoan' eta kale neurketa egingo da. Udaletxetik hauxe esaten dute 'Baietz 50!' Euskararen eguna dela eta, tenperatura hartu nahi dugu Deban euskarari. Horretarako kale neurketak egingo dira, taberna eta denda inguruetan, futbol zelai eta frontoietan... Ea kalean jasoko ditugun elkarrizketen erdiak euskaraz egiteko gai garen». Gaztelekuan euskaraokea egingo da bakoitzak mikrofonoa hartu eta bere trebetasuna erakutsi beharko du besteen aurrean.

Igandean, Euskararen Nazioarteko Eguna izango da. Eguerdiko hamabietan, Euskaraldiaren aurkezpena egingo da Agirre jauregiko ispiluen gelan; datorren urtean, Topagunearen eta Eusko Jaurlaritzaren eskutik, Euskal Herri osorako proposatuko den egitasmoarena, hain zuzen ere. Herritar guztiei, eta eus-kaltzaleei bereziki, bideratutako ekitaldia. 13:00etan Gozatu euskara ahoan eta kale neurketa egingo da berriz ere eta herriko umeek Kolore Anitzekin jolasteko aukera izango dute.

Arratsaldean, bostetan, Kultur Elkartean animaziozko film bat eskainiko da. 'Hurrak eta Lapurrak', Surly katagorriak eta Lagun haren adiskideak egundoko kolpea jotzeko asmoa dute fruitu lehorren denda batean. 19:00etan 'Pikadero' filma eskainiko da Kultur Elkartean. Egoera ekonomikoaren gatibu, gurasoen habia utzi ezinik dabilen bikote gazte batek arazo larriak ditu gurasoen etxean bikote-eginbideak betetzeko.

Contenido Patrocinado

Fotos

Vídeos