'Feminismoa eta euskara' izeneko solasaldia eta bertso-afaria bihar, Akebai-k antolatuta

F.M. EIBAR.

Emakumeen ikuspegia protagonista izango da Eibarren Akebai plataformak antolatzen duen Hamaika Berbaldi saioaren hurrengo ekitaldian. 'Feminismoa eta euskara' izenburupean solasaldia izango da bihar, ostirala, 18:30ean udaletxeko patioan. Bertan Idurre Eskisabel eta Lorea Agirre arituko dira. Biak kazetariak eta antropologoak dira, biak beasaindarrak, eta biek landu dute generoa. Interesa duen publikoari irekia da saioa.

Hamaika Berbaldien barruan ospatzen diren ekitaldiak ez dira inoiz berdinak izaten eta biharkoak jarraipena izango du. 21:00etan bertso-afari feminista antolatu dute Kultu Tabernan, Maialen Lujanbio, Miren Amuriza eta Nerea Ibarzabalen partehartzearekin. Desiree Magro eibartarra arituko da gai jartzaile lanetan. Txartelak salgai daude Kultun bertan, 20 eurotan (15 euro soldata gabekoentzat). Ekitaldi hauen antolatze lanetan Arrate Kultur Elkartea, Nalua Eibarko talde feminista, Eibarren Akebai eta Hankamotxak bertso eskola aritu dira.

Contenido Patrocinado

Fotos

Vídeos