Eskaintza zabala prestatu du UEUk Eibarko udako ikastaroetarako

Egoitza. Markeskua prest dago ikasleak hartzeko./MORQUECHO
Egoitza. Markeskua prest dago ikasleak hartzeko. / MORQUECHO

'Elkar ekin' lelopean 35 ikastaro antolatu dira guztira, eta horietatik 15 Markeskuan izango dira ekaina bukaeran eta uztailan

Félix Morquecho
FÉLIX MORQUECHOEIBAR.

Eguzkia lan askorekin dabil izpi mehe batzuk hodeien artean sartzeko, baina egutegiak ez dio zeruari erreparatzen eta bere zenbakiei fidela da: uda gainean dugu. Horrekin batera Markeskua jauregia bere egun zaratatsuenak bizitzeko prestatzen ari da. Udako ikastaroak badatoz eta aurten ere 'Elkar ekin' izenburupean dator Udako Euskal Unibertsitateak prestatutako programa. Hainbat aukera daude profesionalentzat, eta interes orokorragoak duten pertsonentzat ere.

Uda honetarako 35 ikastaro antolatu dira, eta horietako 15 Eibarren egingo dira. Markeskua jauregian du bere egoitza nagusia UEUk eta bertan ospatzen dira ikastaroak urtero. Irati Iciar, UEUn etengabeko prestakuntzako arduradunaren esanetan, sei multzotan banatu daitezke aurtengo ikastaroak: espezializatuak (aurretik jakintza maila bat beharrezkoa da), dibulgazioko ikastaroak (interes orokorreko ikastaroak dira eta jakintza maila zeha-tzik ez da behar), garapen pertsonaleko ikastaroak, jardunaldiak, hi-tzaldiak eta tailerrak. «Aurten barnetegia berreskuratuko dugu Baionako Udako Ikastaroetan, Etxepare lizeoarekin lortutako hitzarmena medio», azaldu zuen Iciarrek.

Hilaren 28 eta 29an. 'Docker praktikoa
garapena eta DevOps', 'Hazi, Eraiki, Hezi (II): haurrak espazio sortzaile' eta 'Herrigintzaren aro berri baterako begiradak'.
Uztailaren 5 eta 6an. 'Kataluniako Errepublika, zergatik eta zertarako' (uztailaren 5an), 'Blockchain
kriptotxanponez haratago, teknologia ezagutu eta trebatzeko tailerra', 'Grasshopper 3D eta arkitektura proiektu algoritmikoa. Oinarriak eta proiektu mekanismoak', 'PISA azterketako irakurketa probaren analisia eta lanketa bideak'.
Uztailaren 9-13ko astean. 'Generoaren historia
irakaskuntza tresna', 'Satelite bidezko datu libreen prozesamendua QGIS erabiliz', 'Unibertsitate Ekintzailea eraikitzen: Euskal Herriko eta Latinoamerikako begirada eta proposamenak unibertsitate eta gizarte eragileentzat', 'Sexuaren eraikuntza norberarengandik', 'Bibliografiaren kudeaketa Zotero (software librea) erabiliz', 'Dibulgazioan hasten eta hazten', 'Norberaren NIA (PLE) osatuz: ikerketarako baliabide digitalak', 'Ahozko komunikazioa errazteko tresnak' eta 'Code erabiltzen ikasteko tailerra (Elhuyarren Zientzia Azokako irabazleentzat)'.

Kalitatezko formakuntza eskain-tzea eta euskaraz egitea da udako ikastaroen helburu. Aurtengoa 46. edizioa izango da Eibar, Iruña eta Baionan egingo dena. Ikastaro gehienak bi egunekoak dira eta Markeskuan eskainiko direnak hiru asteetan banatuko dira, San Juan ostekoa ekainean eta uztaileko bi lehen asteetan.

Ikastaroetaz gain, lan esparru desberdinetako topaketak antolatzen ditu UEUk eta aurten hiru izango dira Eibarren udako eskaintzarekin batera. Lehenengoak, datorren astean bilduko ditu psikologia arloko profesionalak. 'Psikologo euskaldunen II. Topaketak' ekainaren 16an burutuko dira Markeskuan.

Matematikarien topaketa

Bigarren topaketa ekainaren 28an izango da, 'Informazio eta Dokumentazio Kudeatzaileen IV. Bilkura: Zerbitzu berriak erabiltzaile berrientzat. Erabiltzaile berriak zerbitzu berrietarako' izenburupean. Zenbakiak nagusi izango dira hirugarren zitan, uztailaren 4an egingo direlako 'Matematikari euskaldunen III. Topaketak eta geogebra erabiltzaileen II. Topaketak'.

Ikastaro guztien ordutegi, irakasle eta zehaztasun guztiak Markeskua jauregian edota www.ueu.eus orrian aurkitu daitezke. Bertan ere matrikula osatzeko aukera dago. Epea ikastaroaren arabera aldatzen da baina orokorrean, astebete lehenago arte egin daiteke.

Aurreko urteetan bezala, badaude diru-laguntzak ikastaroetan parte hartzeko. Ikasle, langabetu eta jubilatuek badituzte beherapenak matrikuletan, eta Eibarko Udalak ere dirulaguntzak eskaintzen ditu herritarrentzat. UEUk Markeskuan du bere egoitza nagusia 2000. urtetik eta urtean zehar hainbat ikastaro antolatzen ditu bertan.

Contenido Patrocinado

Fotos

Vídeos