Diario Vasco

Oso arrakastatsua izan zen 'Izarrekin berbetan' egitasmoaren lehen saioa

Zozketa irabazi zuten gaztetxoak, Riesgo eta Gonzalezekin.
Zozketa irabazi zuten gaztetxoak, Riesgo eta Gonzalezekin. / N. I.

Antzokia bete egin zen asteartean, 'Izarrekin berbetan' egitasmoaren lehen emanaldian. 150 gaztetxotik gora gerturatu ziren Asier Riesgo eta Mikel Gonzalez futbol jokalariak ikusi eta en- tzutera.

Koikili Lertxundik gidatu zuen solasaldia. Bertan, Soraluzeko haur eta gazteek galderak egin zizkieten jokalariei. Fisika, kimika, matematikak, kirola eta elikadura izan ziren galderen ardatzak. Riesgok eta Gonzalezek, eskolako amantala jantzita zutela, guztiak erantzun zituzten.

Euskerari buruz ere hitz egin zuten. Izan ere, euskara sustatzea egitasmo honen helburuetako bat da. Riesgok esan zuenez, Eibar kirol elkartean ez du euskera nahi bezain beste erabiltzen, taldekide gehienek ez dakitelako. Gonzalezek, ordea, Realean erabiltzen du, gehienak euskaldunak direlako.

Entzule batek lehen mailako futbolaria izatearen ametsari buruz galdetu zien. «Orain gozatu egin behar duzue, ondo pasatu futbolean jolasten», erantzun zuen Mikelek, «eta garaia heltzen denean emango duzue saltoa kirol profesionalera». Koikilik, bere aldetik, argi utzi zuen gutxik ematen dutela saltoa eta ikasketak amaitzea garrantzitsua dela. Gainera, jokalarien hitzetan, kirol profesionala gogorra da.

Saio amaieran beraiek sinatutako lau baloi zozketatu zituzten eta sarituak poz pozik joan ziren etxera.

Recibe nuestras newsletters en tu email

Apúntate