Diario Vasco

Gaztañerre azoka baserriko lana balioan jartzeko izan behar da

Gaur Gaztañerre azokaren hogeitabatgarren emanaldia ospatzen da. Urte hauetan zehar gero eta pisu gehiago hartu du azokak, sendotu egin da, baina bai baserritarren aldetik, bai Udalaren aldetik ere, egitasmo honen helburua gogoratu nahi dute.

Ondo dago egun horretan guztiok azokara hurbiltzea eta azokaren inguruan antolatutako ekintzetan parte hartu eta primerako egun bat igarotzea, baina hori baino askoz gehiago da azoka. Javi Garmendia zinegotziaren hitzetan, «ondo dago azoka egunean baserritarrez eta baserriko lanaz oroitzea, baina egunero hor daudela pentsatu behar dugu. Beraz, urte osoan zehar, azokara joan, bertako produktuak erosi eta baloratu egin behar ditugu».

Goizeko bederatziretan zabalduko ditu ateak azokak eta bertan 9 barazki salmenta postu egongo dira, 15 artisau postu eta 9 ganadu postu. Fruituak, barazkiak, gazta, eztia, makilak, otarrak, opariak, liburuak eta abar luze bat erosteko aukera egongo da. Horrez gain, goizean zehar, herri kirolak, bertsolariak, trikitilariak eta dantzak egongo dira ikusgai.

Aurtengo omenduak, Txurruka Azpi baserriko Martina Ansola eta Ostegieta baserriko Mateo Oruesagasti izango dira.

Recibe nuestras newsletters en tu email

Apúntate