Diario Vasco

'Bi izarren kalenturak' obrarekin hasiko da gaur 'Antzerkiaz blai' ekimena

Ane Gabarain aktorea kultur etxean izango da gaur.
Ane Gabarain aktorea kultur etxean izango da gaur. / UNANUE
  • Ane Gabarain eta Iñake Irastortza dira aktoreak

Gaur hasi eta hurrengo abenduaren 3ra bitartean 'An-tzerkiaz Blai' jardunaldiak izango dira Mutrikun, era guztietako emanaldiekin osatuak ohi bezala; talde profesionalak, amateurrak eta herriko bi taldeak bertan izango direlarik, eta beti bezala, asteburuak aprobetxatuz.

Hasteko, gaur, 19:00etatik aurrera, punta-puntako emanaldia izango da Zabiel kultur etxeko ganbaran, bertan Txalo Produkzioak konpainiak 'Bi Izarren Kalenturak' obra eskainiko bait dute. Eskenatoki gainean guztiz ezagunak diren bi aktore izango dira; Ane Gabarain eta Iñake Irastortza.

Obraren trama ere erakargarria da, bi emakumek; Hortensia eta Gertrudis, aspaldiko partez topo egingo dute, bata aktoresa famatua da eta bestea idazlea eta antzerki zuzendaria, elkarrekiko miresmena dute baina baita gorrotoa ere, eta biak ala biak elkarren beharra dute, eta hor sortzen da trama komedia klabean. Victor Haim izan zen idazlea eta 2003an Moliére saria eskuratu zuen.

Euskarazko itzulpena berriz Ramon Agirrek burutu zuen eta zuzendari lanetan Begoña Bilbao izango da. Emanaldiaren sarrera 5 eurokoa izango da eta ikusleei garaiz joatea gomendatzen zaie obraz behar bezala gozatu ahal izateko. Hurrengo emanaldia berriz ostiralean izango da gaueko 22:00etan eta bertan 'Xentimorik gabe' taldeak 'Putinen Guardasola' obra eskainiko du doan.

Recibe nuestras newsletters en tu email

Apúntate