Uztailaren 3tik 27ra bitartean izango dira Udaleku Irekiak

Udalekuak. Ederki pasatzen dute antolatutako jolas eta ekintzetan. /  DV
Udalekuak. Ederki pasatzen dute antolatutako jolas eta ekintzetan. / DV

Izena emateko epea zabalik dago dagoeneko eta hurrengo astelehena izango da azken eguna

DV EZKIO.

Urtero antolatzen dira eta geroz eta gaztetxo gehiagok parte hartzen dute Ezkioko Udaleku Ire-kietan, aurten uztailaren 3an hasi eta lau astez hauetaz gozatzeko aukera izango dutelarik hiru urtetik gorako haurrek.

Urteak dira Udaleku irekiak antolatzen dituela Ezkioko Udalak, eskola amaitu eta uztailan zehar, goizetan, haurrek ederki pasatzeko aukera izan dezaten. Oraingoan, uztailaren 3an hasi eta 27ra bitartean aurrera eramango dira.

Goizeko 10:00etan hasi eta 12:30ak arte elkartuko dira egunero (astean zehar) haurrak, Udalekuak Santa Lutziko Anduaga etxean aurrera eramango direlarik, beti ere txango txikiak eta egun bereziak beste lekuren batean burutuko dituztelarik. Udaleku hauek hiru urtetik hamabost urtera arteko haurrentzat dira, txikienak 2015ean jaiotakoak izanik. «Ezkioko Udaletxeko beheko solairuan finkatzen dira gazteak eta hortik, egun berezietan, leku desberdinetara mugitu egiten dira: txango txikiren bat ingurura, Ormaiztegiko piszina... Ederki pasatzen dute, oraingoan lau astez, uztailaren 3an hasi eta 27ean amaituko direlarik», azaltzen dute antolatzaileek.

Gai desberdinak jorratzen dituzte Udalekuetan eta aurten 10-15 urte bitarteko gazteekin bereziki kirola jorratuko da, horretarako mendi irteerak egingo dira (Kizkitza, Izazpi...), edo saskibaloi eta pilota partidak jokatuko dituzte, besteak beste.

Udalekuen prezioa, aurrekoetan bezala, familiaren haur kopuruaren araberakoa izango da, 30 eta 55 euro bitartean: haur bat duenak, 30 euro ordainduko ditu; bi haur dituenak, 42 euro; eta hiru haur edo gehiago izanez gero, 55 euro.

Izena eman

Haur ugariek parte hartzen dute herriko Udalekuetan. Adin desberdinetakoak izaten dira, eta honen arabera osatzen dituzte taldeak, batzuetan ekintzak ere adin tartera egokitzen direlarik.

Udalekuetan parte hartzeko izena emateko epea zabalik dago dagoeneko eta ekainaren 4an, hurrengo astelehenean amaituko da (943 721 303). Izena ematen dutenen arabera antolatuko dira taldeak eta programa. Hasi aurretik bilera bat egingo da gurasoekin eta horregatik izena ematerakoan telefono zenbakia eskatuko da harremanetan jarri ahal izateko.

Contenido Patrocinado

Fotos

Vídeos