Gabonetako saskiak banatu dira eskualdean

Gainzuriko sarreran, Urko Mungia./ARGAZKIAK BERTATIK BERTARA
Gainzuriko sarreran, Urko Mungia. / ARGAZKIAK BERTATIK BERTARA

FCO. JAVIER AGUADO GOÑIURRETXU.

Bertatik Bertara, Uggasa Urola Garaiko Garapen Agentziaren, Goimen Goierriko Landa Garapen Agentziaren eta proiektuari babesa ematen dioten zazpi udalen (Legazpi, Zumarraga, Urretxu, Ormaiztegi, Ezkio, Itsaso eta Gabiria) lankidetzari esker, Urola Garaiko baserritar ekoizleen produktuak ezagutzera emateko lanean jarraitzen dute. Asmo horrekin, aurten ere Gabonetako zozketak egin dituzte. Sasoiko eta bertako produktuekin osatutako zazpi kaxa zozkatu dituzte.

Aurten, proiektuarekin bat egiten duten jangela kolektiboetan egin dituzte zozketak. Hauek izan dira parte hartu duten jangela kolektiboak: Legazpiko Meazti etxea, Urretxu-Zumarraga ikastola, Gainzuri ikastetxea, Ormaiztegiko San Andres eskola, Ezkio-Itsasoko eskola txikia eta Gabiriako eskola txikia. Guztira, zazpi gabonetako saski banatu dira eskualdeko jangeletan eta sarean.

«Zergatik jangeletan? Bada, urte osoan zehar egindako lana ikusazi eta balioan jarri nahi dutelako. Pixkanaka bada ere, pausoak ematen ari dira eskualdeko jangeletan erabiltzen diren bertako produktuak gero eta gehiago izan daitezen. Hala, ikasleen elikadura osasuntsua bultza-tzeaz gain, txikitatik bertako produktuaren aldeko kontzientzia sustatu nahi da, eta, bide batez, gure baserritarren produktuei merkatu berri eta egonkor bat ireki», diote antoaltzaileek.

Bide horretan, noski, ezinbestekoa da jangeletako arduradunen kolaborazioa. Legazpiko Meazti etxean, Urretxu-Zumarraga ikastolan, Gainzurin eta Ezkio-Itsasoko eskola txikian badaramatzate urte pare bat bertako produktuaren aldeko apustua eginez, eta dagoeneko eman dituzte pausu esanguratsu batzuk. Aurten, berriz, jangela berri bat batu zaie proiektura, Gabiriakoa. Bestalde, Ormaiztegiko eskolan izan dira beren proiektuaren berri ematen, eta oraindik pauso zehatzik eman ez bada ere, bat egiten dute filosofiarekin.

Jangeletan egindako zozketen bidez, egiten ari diren lana saritu nahi da, eta ikasle zein gurasoen artean ere bertako produktuak ezagutzera eman. Hauek izan dira jangeletako zozketetako irabazleak: Urretxu Zumarraga ikastola: Teo eta Luka Alvarez Artolazabal; Gainzuri: Urko Mungia Peñagarikano; Meazti: egunotako menuak prestatzeko erabiliko dituzte saskiko produktuak; Ezkio-Itsaso: Unai Mendizabal Etxezarreta; Ormaiztegi: Maier Larrañaga; Gabiria: Xabat Elgarresta.

Horrez gain, Bertatik Bertararen Facebook orrialdean ere zozkatu dute saski bat. Izan ere, atzo abenduaren 21ean eta jarraitzaile gehiago dituzte plataforma horretan, eta proiektua ikusarazteko bide nagusietako bat bilakatu da. Irailaz geroztik, hilero hilero bertako produktuen promozioak egiten dituzte Facebooken, eskualdean zer, non eta nola ekoizten den erakusteko asmoz.

Jarraitzaileen erantzuna ezinhobea da. Facebookeko zozketan 80 parte hartzaile inguru izan dira guztira, eta hauxe izan da irabazlea: Leire Alfonso Ortega, Zumarragakoa.

Gabonetako saskian ondorengo produktuak sartu dituzte: Gazta (Makatza, Baztarrika eta Erreizabal baserrietakoak), Eztia (Aikur, Urretxu), Sagarrak (Katarain, Gabiria), Pastak (Irigon, Urretxu), Yogurrak (Agerre, Urretxu), eta Intxaurrak (Agerre, Zumarraga).

Bertatik Bertara egitasmoaren ardatz nagusietako bat ekoizle eta merkatarien artean sareak osatzea da, ahal den neurrian eskualdean ekoitzitako produktuak bertako denda txikietan merkaturatu daitezen. Orain arte Legazpiko eta Urretxu-Zumarragako dendak zituzten proiektuaren baitan, baina sarea zabaltzen jarraitzen dute, eta abenduan pauso garrantzitsu bat eman dute, eta Ormaiztegiko dendek ere bat egin dute proiektuarekin.

Contenido Patrocinado

Fotos

Vídeos