Diario Vasco
Umorez. Pasa diren urteetan giro bikaina sortu zen bertsotan.
Umorez. Pasa diren urteetan giro bikaina sortu zen bertsotan.

Hemen da Martxoan Bertsoa ekimena

  • Gipuzkoako Herriarteko txapelketak eta Martxoan Bertsoak bat egingo dute datozen asteetan

Neguan bete-betean sarturik gauden honetan, bertsoak protagonismoa berreskuratuko du Urretxun eta Zumarragan. Bertsozaleak zain egoten dira garai hau noiz iritsiko, Martxoan Bertsoak bertso ziklo arrakastatsuaren edizio berri bat jartzen baita abian beti sasoi honetan. Aurten, gainera, Gipuzkoa mailan jokatzen ari den Herriarteko Bertsolari Txapelketarekin bat egingo du, egutegi aldetik behintzat, herriko bertso txapelketa umoretsuak.

«Bertso eskolako bi talde ari gara Gipuzkoako Herriartekoan parte hartzen, eta beste herri batzuen aurka saioak jokatu behar ditugu. Martxoan Bertsoa ere garai honetan antolatu ohi dugu, eta bateko eta besteko saioekin bertso jarduna oparoa izango da ondorengo asteetan», diote antolatzaileek.

Horrela, herriko taldeetako batek (Simimisol izen umoretsua jarri diote talde horri) Lasarte-Oriako taldearen aurka neurtuko ditu indarrak datorren ostiralean, hilak 17, Gaztelekun, 23:00etatik aurrera. Hurrengo astean (otsailak 24) talde horrek Aian kantatuko du bertako taldearen aurka, eta herriko beste taldeak (Potoxop), Oiar-tzunen egingo du bere ekitaldia. Azkenik, martxoaren 11n kantatuko du Potoxop-ek herrian, hain zuzen Amalur elkartean egingo den bertso afarian.

Saio horiek jokatu ostean multzo bakoitzeko talderik onena igaroko da hurrengo fasera. Ikusi egin behar, beraz, Simimisol edo Potoxop aurrera egiteko moduan dauden, nor bere multzoko taldeei gailentzeko gai den, alegia.

Bertso eskolako kideen esanetan, «ilusio handiz gaude Herriarteko Txapelketa hasteko zain, bertsolariak ez ezik gaijartzaileak, epaileak eta bestelako laguntzaileak ere bildu baititugu mugimendu honen ai-tzakian, eta horrek herriko bertso sarea ehun-tzen jarraitzeko balio izan digu».

Martxoan Bertsoa zikloak, bere aldetik, 15. edizioa beteko du aurten. Taldekako txapelketa umore-tsuari eutsi egin diote aurten ere bertso eskolako kideek, eta gehienetan bezala 3 kanporaketa eta finala izango ditu aurtengo ekinaldiak. Martxoaren 3an, 4an eta 10ean izango dira kanporaketak, Apatxe, Motz eta Fox tabernetan, hurrenez hurren, eta finala martxoaren 25ean jokatuko da, larunbatarekin, ohi bezala Gaztelekun.

Finaleko eguna, ordea, berezia izango da. «Aurten 15 edizio beteko ditugula eta, edizio guztietan parte hartu duten bertsolariak elkartu eta egun osoko egitarau bat prestatzen ari gara. Bazkari jendetsu bat egin nahi dugu eta bazkalostea bertsoz eta kantuz girotu, aurtengo txapelketako finalarekin emateko egunari amaiera», azaltzen dute. Aipagarria da 100 lagun baino gehiagok hartu dutela parte txapelketan, edizio guztietako partaideak kontuan hartuz. Ez da jendetza makala.

Orain arte aipaturiko ekintzak gutxi balira, martxoaren 17an, ostirala, bertsoarekin lotutako emanaldi bereziak izango ditugu Gaztelekun. Iluntzeko 20:00etan Autobiographikal taldearen poesia antzerkituaz gozatzeko aukera izango da eta egun berean, gaueko 23:00etan, Bertsxortan taldeak seriotasunari barre egiteko bideak proposatuko ditu, emanaldi fresko eta atseginean. Aurtengo zikloa bukatzeko aste hauetan herriko ikastetxeetan martxan dagoen Zumarraga-Urretxuko Eskolarteko Bertsopaper Lehiaketaren sari banaketa izango da Zelai-Arizti aretoan, martxoaren 31n.

Astebete geroago Korrika gure herriotatik igaroko da eta momentuz iragarri ez den arren, litekeena da bertsoarekin zerikusia duen beste ekimenen bat egotea euskararen aldeko ekimen jendetsu horren aitzakian.

Presta gaitezen, bada, bertsoaren olatura igo eta gozatzeko.

Recibe nuestras newsletters en tu email

Apúntate