Diario Vasco

Dena prest Mingainluze lehiaketaren 6. edizioa hasteko

Iazko Mingainluze lehiaketako talde irabazleak.
Iazko Mingainluze lehiaketako talde irabazleak. / AZKARATE
  • Parte hartzaileek proba ezberdinak egin beharko dituzte, beti ere hizkuntzaren erabilera eta arlo askotako jakintza konbinatuz

Aurreko urteetako arrakasta ikusirik, Mingainluze lehiaketaren edizio berri bat antolatu dute datozen asteburuetarako Zumarraga eta Urretxuko udaletako euskara eta kultura sailek. Gabonak baino lehen izen-emate epea irekita egon zen eta guztira 44 taldek eman dute izena aurtengo ediziorako. Lehen hezkuntzako 5. eta 6. mailetako haurrei zuzendurik dagoen lehiaketa da Mingainluze, eta hiruko taldetan eman dute izena gaztetxoek.

Hortaz, 132 gaztetxo igoko dira, txandan-txandan, Labeaga aretoko oholtza berezira. Antolatzaileen esanetan, «parte hartzea aurreko urteetako ildo beretik burutu da eta beste behin ere benetan gustura gaude beste urte batez gaztetxoek emandako erantzunarekin».

Izena emandako talde kopuru handia ikusirik, aurreko urteetako bideari eutsiz bi aurrekanporaketa saio egingo dira, eta talde onenek aurrera egingo dute, finalerdietara. «Aurrekanporaketa saioak nahiko jendetsu eta zalapartatsuak izan ohi dira, baina gaztetxo guztiek euren aukera izan dezaten bermatzen dute. Izan ere, garrantzitsuena parte har-tzea da eta horrela denek izango dute parte hartzeko aukera». Aurrekanporaketak eta finalerdiak pasata, talderik onenek jokatuko dute aurtengo Mingainluzeko final handia.

Aurrekanporaketa saioak datorren asteburuan izango dira, urtarrilak 14 eta 15, arratsaldeko 17:00etatik aurrera, Labeaga aretoan. Hurrengo asteburuan finalerdiak izango dira (urtarrilak 21 eta 22) eta finala urtarrilaren 29an jokatuko da, igandearekin. Saio guztiak irekiak dira eta edonor hurbildu daiteke gaztetxoen abilezia gertutik ikustera.

Parte hartzaileek proba ezberdinak egin beharko dituzte, beti ere hizkuntzaren erabilera eta arlo askotako jakintza konbinatuz. 'Tribuaren berbak', 'Erantzuna emanda', 'Potokumeak', 'Imintzioka' edo 'Zer da zer' dira Mingainluzen egingo diren frogetako batzuk.

Sorpresak ere egongo direla aurreratu dute antolatzaileek; euren hitzetan «aurreko urteetan oso gustura geratu ginen lehiaketak izandako harrerarekin, erabat egonkortu da eta gaztetxoak data noiz iritsiko zain egoten dira. Aurten ere aurreko urteetako mailari eustea da erronka». Lehiaketako talderik onenek sari ederrak jasoko dituzte eta bukaeran partehartzaile guztien-tzat merienda eder bat ere egongo da, besteak beste. Behin Mingainluze bukatuta eta ihauteriak atzean utzita, txikiagoek 'Trebezia lehiaketan' parte hartzeko aukera izango dute, baina hori beste istorio bat izango da.

Recibe nuestras newsletters en tu email

Apúntate