Diario Vasco

Patxi Zubizarreta idazlea Irakurle Taldean izango da gaur Urretxuko Aizpurenea kultur etxean

Patxi Zubizarreta idazlea gaur kultur etxean.
Patxi Zubizarreta idazlea gaur kultur etxean. / AGUADO
  • 'Laranja bat zaborretan' lana izango da aztergai gaurko saioan

Zumarraga eta Urretxuko euskarazko irakurle taldeak 2016-2017 ikasturteko bigarren saioa egingo du gaur Urretxuko kultur etxeko areto nagusian, ohi bezala arratsaldeko 19:00etatik aurrera

Oraingo honetan, Patxi Zubizarreta idazle ordiziarraren 'Laranja bat zaborretan' liburua izango da hizketagai (Elkar argitaletxearen eskutik 2015ean kaleratua). Saioa irekia da nahi duen jende guztiarentzat. Hori bai, ohi bezala «aurretik liburua irakurrita joatea lagungarria da».

Idazlea

Patxi Zubizarreta Dorronsoro (Ordizia, 1964) euskal idazle oparoa da. Euskal Filologiako ikasketak egin zituen Gasteizen eta bertan bizi da gaur egun. Helduen literaturan eta itzulpengintzan lan asko egindakoa den arren, haur eta gazte literaturan argitaratutako lanengatik da bereziki ezaguna. Beste hamaika sariren artean, hiru aldiz eskuratu du Haur eta Gazte Literaturaren Euskadi Saria: 1997an, 'Gizon izandako mutila' lan zirraragarriarekin; 2006an 'Pantaleon badoa' liburuarekin; eta 2010ean 'Xia Tenzinen bidaia miresgarria' lanarekin. Horrez gain, kolaboratzaile lanak ere egin ditu hainbat hedabidetan.

Hainbat genero landu ditu Zubizarretak: errealismo fantastikoa, zientzia fikzioa, bidaia-liburua, umorea, familia, migrazioa, amodioa, kultura-aniztasuna eta herri-literatura. Baina gehien landu duen generoa ipuina da. Hainbat lanetan maiz jaso ditu tradiziotik etorritako ipuinak, narrazio nagusi batean harilkatuta. Gaiei dagokienez, berriz, bere liburuetan gehien landu duen gaia inmigrazioarena da, bereziki Ipar Afrika eta Europa artean ematen dena. Gai hau, immigrazioa, haurrentzako ulergarria den moduan azaltzen du, haiek erraz eta egoki uler dezaten.

Hurrengo proposamena

Aurreko urteetako ildo berari jarraika, 8 saio izango ditu aurtengoan ere euskarazko irakurle taldeko jardunak. Abenduan hirugarren saioa izango da, eta saio horretan ere ez da kanpoko bisitarik faltako. Hain zuzen ere, Iñaki Mendiguren idazle eta itzultzailea izango da irakurle taldera gerturatuko dena, 'Haltzak badu bihotzik' bere lana aitzakia harturik itzulpengintza ere jorratuko duena, Sarah Turtle bere emazte eta lankidearekin batera.

Urtarrilean, berriz, Mikel Peruarena Ansaren 'Su zelaiak' landuko da, idazlea bertan izango delarik baita ere. Aurrerago, izango da beste saiorik, harik eta maiatzean ikasturtea amaitzen den arte.

Recibe nuestras newsletters en tu email

Apúntate