Diario Vasco

Jon Alonsoren 'Erretzaileen eremuak' liburuak irekiko du irakurle taldea

Zumarraga eta Urre-txuko euskarazko irakurle taldeak 2016-2017 ikasturteko lehenengo saioa egingo du gaur asteazkena, Urretxuko liburutegian, ohi bezala arratsaldeko 7etatik aurrera. Oraingo honetan, Jon Alonso idazle iruindarraren 'Erretzaileen eremua' izenburuko liburua izango da hizketagai. Saioa irekia da nahi duen jende guztiarentzat. Hori bai, «aurretik liburua irakurrita joatea lagungarria da».

Jon Alonsok ibilbide emankorra egin du dagoeneko euskal literaturaren unibertsoan. Biologia ikasketak egin zituen Euskal Herriko Unibertsitatean, eta Nafarroako Unibertsitate Publikoan itzultzaile lanetan dihardu.

Hainbat komunikabidetan lankide da, Euskadi Irratiko 'Sormenari leiho' saioan ere aritu da, baita hainbat mintegi eta lantegitan ere. Idazle lanetan, Iruñeako Korrok literatur aldizkarian egin zituen lehen urratsak, beste hainbat idazleren gisan, hala nola Josetxo Azkona eta Mikel Taberna. José Saramagoren eta Julio Cortazaren lan bana euskaratu ditu. 1997an Joseba Jaka I. Literatura Beka eskuratu zuen, 'Camembert helburu' eleberri-saiakera idazteko. 2007an, Argia aldizkarian idatzi zuen 'Euskadi Sariak' artikulua, hainbat idazle eta itzultzailek Utikan Euskadi Sariak agiria sinatzeko pizgarria bihurtu zen. 2007an ere 'Erretzaileen eremua' ipuin liburuagatik Espainiako Kritika Saria eman zioten.

Hain zuzen ere horixe da gaurko saioan landuko den liburua. Aurtengo ikasturtean ere ildo beretik segituko du euskarazko irakurle taldeak. Guztira zortzi saio egitea aurreikusten da, maiatzera bitartean. Tarteka irakurriko diren liburuen idazlea ere saioan izaten ahalegina egingo du taldeak. Urrutira joan gabe, azaroko saioan Patxi Zubizarreta idazle ordiziarra izango da irakurle taldeko saioan. Aurrerago ere, «idazle gehiago gure artean izan daitezen saiatuko gara», diote irakurle taldeko arduradunek.

Recibe nuestras newsletters en tu email

Apúntate