Haztegi Ikastolaren 50. urteurrena ekintzaz betea dator

Ikastolako irakasleak urteurreneko plaka esku artean, haien inguruan, Xegun Altolagirre, Nekane Arin, Sagrario Etxabe eta Ane Beloki. /
Ikastolako irakasleak urteurreneko plaka esku artean, haien inguruan, Xegun Altolagirre, Nekane Arin, Sagrario Etxabe eta Ane Beloki.

Egitaraua Merkatu Txikiaren baitan aurkeztua izan zen. Hurrengo hitzordua '1967ko suaren bila' bideo emanaldia izango da, abenduaren 26 eta 27an, Latxartegi aretoan

CRISTINA LIMIA LEGAZPI.

Merkatu Txikiaren aingura, ikastolaren 50. urteurreneko ekintzak aurkeztu zituen Haztegik larunbatean. Ospakizunak azaroan hasi ziren, Benito Lertxundik Urbeltz pilotalekuan eskaini zuen kontzertuan. Bertan, ikastetxeko haurrek urteurrenerako sortu den abestia kantatu zuten. Hilabete honetan beste bi ekintza gauzatuko dira. Alde batetik, joan den larunbatean, egingo diren ekimenen berri eman eta urteurrena dela eta, ikastolan jarriko den plaka aurkeztuak izan ziren. Azken honek, Ane Belokik egindako bertsoa darama idatzia eta datozen egunetan jarriko da eskolan. Ekitaldiak ikastolaren lehen urratsetako eta gaur egungo ibilbideko pertsona ugari bildu zituen, horien artean Nekane Arin (lehenengo irakaslea izan zena), Jose Inazio Elorza (Kimu Berriren sor-tzaileetako bat), Xegun Altolagirre (Artezkaritzako lehendakaria), Sagrario Etxabe (Haztegiko zuzendaria), irakasle, ikasle eta familia ugari.

«Aitzindariak izan ginen orain dela 50 urte euskara eta euskal kultura ardatz hartuta hezkuntza eredu bat eraikitzen, eta aitzindari izaten jarraitzen dugu, 1967an 40 ikasle zituela sortu zen ikastola eta ikasturtez ikasturte, bizirik jarraitu ez ezik sendotu ere egin da, izan ere, gaur egun 670 ikasle inguru ditugu, indartze horrek guraso, irakasle eta ikasleen arteko elkarlana izan du ardatz, betiere ikaslearen heziketa osoa duela oinarri, euskaran, euskal kulturan eta konpetentzietan oinarritutako hezkuntza eleanitza bultzatuz, gu gara zuhaitz zaharraren kimu berria», adierazten dute Haztegitik.

'1967ko suaren bila'

Urteurreneko hurrengo ekintza '1967ko suaren bila' bideo emanaldia izango da. Bi pase eskainiko dira, abenduaren 26 eta 27an, 18:30etan, Latxartegi aretoan. «Bi bideo erakutsiko dira, lehenengoa pasa den ikasturtean Xabier Aztiria eta Jon Garatek Kimu Berri ikastolaren sorrerari buruz egin zuten dokumentala izango da, dokumental honetan ikastolako sortzaileak, orduko guraso eta irakasleak eta hainbat herritar eta ikasle ohiri egindako elkarrizketak ikusi daitezke, bigarren bideoa berriz, Eneritz Aulestia, Axel Eizmendi eta Telmo Trenadok egin dute eta ikastaloren gaur egungo egoera eta etorkizuna ditu hizpide», azaltzen dute. «Ekitaldia eskarmentu handiko bi ikasle ohik gidatuko dute eta ikusleengana gerturatzen eta hauekin konektatzen saiatuko dira, era berean, dokumentalen egileak ere bertan izango dira», aurreratzen dute. Aforoa kontrolatu ahal izateko, sarrerak egunean bertan euro baten truke salduko direla adi-tzera ematen dute. Urteurreneko gainontzeko ekimenen inguruan, hilero aurreikusten diren ekintzak ezagutzera eman ditu ikastolak, datak hurbiltzen diren heinean zehaztuko dituelarik. Hona hemen egitaraua: abenduan oroimen plaka, '1967ko suaren bila' emanaldia eta kirol jardunaldia, urtarrilean mendi irteera, otsailean Flashmob-a eta kontzertua, martxoan argazki erakusketa, Lilatoian talde bezala parte-hartzea eta mendi irteera, apirilean rock kontzertua eta mahai-ingurua, maiatzean danborradarako konpainia eraketa, mendi irteera, erromeria, ikasle ohien eta irakasleen bazkari eta jaialdia, ekainean ikasturte amaierako festa. Bestalde, urteurreneko kamisetak, jertseak eta zapiak ikastolan daude salgai.

Más

Contenido Patrocinado

Fotos

Vídeos