Diario Vasco

Udaleko euskara saileko diru-laguntzen eskaera egiteko azken egunak

Datorren astelehenean Udaleko Euskara sailak eskaintzen dituen diru-laguntzen eskaera egiteko epea amaituko da. Aurten hiru alorretan emango ditu laguntzak. Lehenengo multzoaren xedea euskara ikasten barnetegietan, ikastaro trinkoetan, zein 100 eskola ordutik gorako ikastaroetan, auto-ikaskun-tza programetan edo herritik kanpo doazen herritarrentzat bekak edo diru-laguntzak eskaintzea da. Barnetegiko ikastaroen kasuan, matrikula prezioaren %40koa izango da diru-laguntza. Auto-ikaskuntzari dagokionez, kontratuz ordaindutakoaren %25ekoa izango da, baita herritik kanpoko ikastaroen matrikularen kasuan ere. Emandako diru-laguntzak bateragarriak izango dira HABE erakundeak eta enpresa pribatuek ematen dituzten diru-laguntzekin. Gain-finantziaziorik eman ez dadin, bestelako diru-laguntzak eskatu dituzten herritarrei hauen zenbatekoa jakin ondoren emango zaie dagokiena. Hala ere, Udalak hala iritziz gero, beste irizpide batzuk erabili ahal izango ditu diru-laguntzen zenbatekoa erabakitzeko, ikasleak egindako ikastaroaren ezaugarriak kontuan izanik.

Bigarren diru-laguntza multzoaren helburua Udako Euskal Unibertsitateak antolatutako ikastaroetara edo euskararen normalizazioarekin zerikusia duten bestelako uda-ikastaroetara doazen herritarrei laguntza eskaintzea da. Eman beharreko laguntza kalkulatzeko zenbait irizpide jarraituko dira, hala nola, langabezian edo ikasten ari diren herritarrei matrikularen erdia ordainduko zaie eta gainerakoei matrikularen herena.

Hirugarren laguntza multzoa merkataritzan euskararen erabilera bultzatzea du helburu eta 2015eko azaroaren 1etik 2016ko urriaren 31 arte, beren establezimenduko kanpoko, nahiz barruko errotulu finkoak, irudi korporatiboa eta web orria euskaraz jartzen dituztenei diru-laguntzak emateko baldintzak arautzen ditu. Euskaraz jarritako irudi korporatiboaren kasuan, kostuaren %50ekoa izango da diru-laguntza, gehienez ere, 300 eurokoa. Web orrien kasuan, euskaraz bakarrik eginez gero, kostuaren %50ekoa izango da diru-laguntza, gehienez ere 500 eurokoa. Web orria euskaraz eta beste hizkuntzatan eginez gero, kostuaren %30ekoa izango da laguntza, gehienez 250 eurokoa.

Informazio gehiago udaletxeko Euskara zerbitzuan edo Udalaren web gunean (Zure Zerbitzura-Diru-laguntzak atalean) aurki daiteke.

Recibe nuestras newsletters en tu email

Apúntate