Diario Vasco

Urriaren bukaerarako, eskola eta jolastokia prest

Obrak. Eskolako bigarren solairua eta jolas parkeko obrak hilabete honetan bukaeran amaituko dira.
Obrak. Eskolako bigarren solairua eta jolas parkeko obrak hilabete honetan bukaeran amaituko dira. / GALILEA
  • Eskolako bigarren solairuan Lehen Hezkuntzako klaseak kokatuko dira; parkean jolas gune desberdinak izango dituzte haurrek

Udako oporrak hartu baino lehen hasi ziren eskolako bigaren solairuko eta jolastokiko berrikuntza obrak, hauek martxa onean doazelarik. Horrela jarrituz gero urriaren bukaeran amaituta egongo dira.

Eskolako bigarren solairuan Lehen Hezkuntzako gelak kokatuko dira, honetan: haurrentzako hiru gela, komuna, eta irakasle edo zuzendariarentzat beste gela txiki bat egongo dira. Aipatutako hiru gela horietako bat nahiko handia izango da eta bertan ere informatika gela izango dute; ordenagailuak bertan egongo direlarik. Altzariak eta beharko diren bestelako materialei dagokienez aurrerago ikusiko da zer eta nola egin, momentuz eskolako haurrek solairu hau ez baitute erabiliko.

«Bigarren pisuko egokitzapena oso aurreratuta dago. Aurreko astean pintorea bazebilen eta orain elektrikaria eta iturginaren azkeneko erremateak falta dira. Hilabetearen bukaerarako amaituta egongo da. Behin dena amaitu ondoren garbiketa orokorra egingo da», azaltzen du Garikoitz Aiesta Ezkio-Itsasoko alkateak.

Parkea

Eskola ondoan dagoen jolastokian ere berrikuntza obrak egiten hasi dira dagoeneko eta hauek ere adostutako epe barruan aurrera doaz.

«Parkeari dagokionez, aurreko astean hasi ziren hondeaketa-lanekin eta horrekin ari dira orain», dio alkateak. Zorua lehundu eta honen gainean kautxozko gomaz egindako zoru berezia kokatuko dute, jolastoki guztian zehar. Honen gainean aukeratutako jolas-gune desberdinak jarriko dira.

Mota eta adin anitzetara egokitutako jolasak egongo dira eskola ondoko haur parke berrian: egurrezko tren dotorea, traktore baten itxura duen txirrista, bi ziburu adin desberdinetako haurrei egokitutakoak, sokaz egindako ziburu borobil handia bi haur edo gehiago aldi berean ibiltzeko, oztopo eta jolas deberdinak biltzen dituen etxe eta zubi handia, perretxiko potolo bat... eta gainera lurreko goman margotutakoari esker jolas deberdinetan aritzeko aukera ere izango dute haurrek.

Herri Eskola ondoan, jolas guneaz gain, kantxa bat ere planteatzen du Udalak. 2016ko aurrekontuetan haurren jolasa onartu zen eta aprobetxatuz eskolan lanak hasi behar zirela, hori ere egiten ari dira momentu honetan, «kantxa hurrengo urteko aurrekontuetan erabakiko da sartu edo ez eta sartzen bada, aurrera eramango da», azaltzen zuen Ezkio-Itsasoko alkateak.

Recibe nuestras newsletters en tu email

Apúntate