Euskararen Eguna ospatzeko ekitaldia egongo da igandean

Ekitaldia. Herriko gazteak Udal Aretoan aurrera eramandako ekitaldi batean. /  GALILEA
Ekitaldia. Herriko gazteak Udal Aretoan aurrera eramandako ekitaldi batean. / GALILEA

Uxue Alberdiren «Aulki bat elurretan» liburuaren talde-irakurketa saioa aurrera eramango da Udalaren aretoan

MIRYAM GALILEA ITSASO.

Euskararen Nazioarteko Egunaren ospakizuna izango dugu igandean, abenduak 3, eta honekin bat egiteko asmoarekin ekitaldi txiki bat aurrera eramango da igandean bertan eguerdian herriko Udal Aretoan.

Nazioarteko Eusko Ikaskuntzak horrela aldarrikatuta, 1949ko abenduaren 3an ospatu zen lehenengo aldiz Euskararen Eguna Euskal Herrian eta hemendik kanpo ere (Parisen, Mexikon, Buenos Airesen, Caracasen, New Yorken eta beste hainbat lekuetan). 1995ean Eusko Jaurlaritzak eta Euskaltzaindiak bat eginik, Euskararen Nazioarteko Eguna instituzionalizatu egin zuten. Harrezkero, urtero egin da egunaren ospakizuna.

«Itsason ere ez genioke egun honi hutsik egin nahi. Hori dela eta, ekitaldi xume bat antolatu dugu datorren iganderako, euskararen erabilera eta euskara bera sustatzeko asmoz», azaltzen dute Udal Batzordetik.

Ekitaldi honek helburu bikoitza izango du. Alde batetik, Uxue Alberdiren «Aulki bat elurretan» liburuaren talde-irakurketa saioa egingo da; eta bestetik, euskal literaturari ateak irekitzeko asmoz, Itsason irakurle taldea eratuko da.

Hitzaordua

Ekitaldia igandean, abenduak 3, eguerdiko 12:30etik 13:30era izango da, Itsasoko Udalaren Aretoan. Udaletik azaltzen dutenez, parte hartzaile bakoitzak liburu hau eskuragarri izango du, ondoren ere irakurketaz gozatu ahal izateko. Herritarrak animatu daitezen deialdia luzatzen dute Udaletik.

Contenido Patrocinado

Fotos

Vídeos