Bertatik Bertara egitasmoaren gabonetako saskiak jangeletan

Jangelak. Ezkio eta Itsasoko eskolako jangelan Unai Mendizabalek jaso du saskia. /  BERTATIK BERTARA
Jangelak. Ezkio eta Itsasoko eskolako jangelan Unai Mendizabalek jaso du saskia. / BERTATIK BERTARA

Ormaiztegiko hiru denda batu berri dira proiektu honetara, guztira 18 zenbatzen dutelarik

MIRYAM GALILEA ALTO UROLA.

Urola Garaiako baserritar ekoizleen produktuak ezagutzera emateko lanean jarraitzen dute Bertatik Bertara egitasmotik, asmo horrekin, aurten ere Gabonetako zozketak egin dituztelarik, sasoiko eta bertako produktuekin osatutako zazpi kaxa hain zuzen ere.

Bertatik Bertaran, Uggasa Urola Garaiko Garapen Agentziaren, Goimen Goierriko Landa Garapen Agentziaren eta proiektuari babesa ematen dioten zazpi udalen (Legazpi, Zumarraga, Urretxu, Ormaiztegi, Ezkio, Itsaso eta Gabiria) lankidetzari esker, baserritar ekoizleen produktuak ezagutzera emateko lanean jarraitzen dute.

Oraingoan, proiektuarekin bat egiten duten jangela kolektiboetan egin dituzte zozketak: Legazpiko Meazti etxea, Urretxu-Zumarraga ikastola, Gainzuri ikastetxea, Ormaiztegiko San Andres eskola, Ezkio etaItsasoko eskola txikia eta Gabiriako eskola txikia. Guztira, zazpi gabonetako saski banatu dira eskualdeko jangeletan eta sarean.

«Urte osoan zehar egindako lana ikusazi eta balioan jarri nahi dugu; horregatik saria jangeletan eman ditugu. Pixkanaka bada ere, pausoak ematen ari gara eskualdeko jangeletan erabiltzen diren bertako produktuak gero eta gehiago izan daitezen. Hala, ikasleen elikadura osasuntsua bultzatzeaz gain, txikitatik bertako produktuaren aldeko kontzientzia sustatu nahi da, eta, bide batez, gure baserritarren produktuei merkatu berri eta egonkor bat ireki», azaltzen dute Bertatik Bertaratik.

Jangeletan egindako zozketen bidez, egiten ari diren lana saritu nahi izan da, eta ikasle zein gurasoen artean ere bertako produktuak ezagutzera eman. Jangeletako zozketetako irabazleak ondorengoak izan dira: Urretxu Zumarraga ikastolako Teo eta Luka Alvarez Artolazabal; Gainzuri ikastetxeko Urko Mungia Peñagarikano; Meazti etxean egunotako menuak prestatzeko erabiliko dituzte saskiko produktuak; Ezkio eta Itsasoko eskolako Unai Mendizabal Etxezarreta; Ormaiztegiko Maier Larrañaga; eta Gabiriko Xabat Elgarresta.

«Horretaz gain, Bertatik Bertararen Facebook orrialdean ere zozkatu dugu saski bat. Izan ere, geroz eta jarraitzaile gehiago ditugu plataforma horretan, eta gure proiektua ikusarazteko bide nagusietako bat bilakatu da. Irailaz geroztik, hilero hilero bertako produktuen promozioak egiten ditugu Facebooken, eskualdean zer, non eta nola ekoizten den erakusteko asmoz», diote.

Bertatik Bertaratik diotenez, jarraitzaileen erantzuna ezin hobea da. Facebookeko zozketan 80 parte hartzaile inguru izan dira guztira, eta irabazlea Zumarragako Leire Alfonso Ortega izan da.

Gabonetako saskian ondorengo produktuak sartu dira: gazta (Makatza, Baztarrika eta Erreizabal baserrietakoak); eztia (Aikur, Urretxu); sagarrak (Katarain, Gabiria); pastak (Irigon, Urretxu); yogurrak (Agerre, Urretxu); eta intxaurrak (Agerre, Zumarraga).

Ormaiztegin ere

Bertatik Bertara egitasmoaren ardatz nagusietako bat ekoizle eta merkatarien artean sareak osatzea da, ahal den neurrian eskualdean ekoitzitako produktuak bertako denda txikietan merkaturatu daitezen. Orain arte Legazpiko eta Urretxu-Zumarragako dendak zeuden proiektuaren baitan, baina sarea zabaltzen jarraitu dute eta abenduan pauso bat gehiago eman da, Ormaiztegiko hiru denda proiektura batu direlarik: Aliprox, Murua harategia eta Estankoa.

Horrela, dagoeneko eskualdeko 18 denda daude Bertatik Bertara sarean.

Contenido Patrocinado

Fotos

Vídeos