Aurtengo Sagardo Astea urriaren 4tik 13ra bitartean egingo da

Sagardo Astea. Hamar egunetan zehar sagarra eta sagardoarekin lotutako ekintzak egongo dira. / GALILEA
Sagardo Astea. Hamar egunetan zehar sagarra eta sagardoarekin lotutako ekintzak egongo dira. / GALILEA

Larunbatean sei urtetik aurrerako haurrek «sagar tentagarriak» tailerrean parte hartzeko aukera izango dute

MIRYAM GALILEA EZKIO.

Igartubeiti baserri museoak Sagardo Astea antolatzen du urtero urrian, bertako dolarea martxan ipiniz eta sagardoa egiteko orain dela 500 urte erabiltzen zen teknika erabiliz. Aurtengoa urriaren 4an hasi eta 13ra bitartean aurrera eramango da, egun hauetan zehar sagarra eta sagardoarekin lotutako ekintza anitzetaz gozatzeko aukera izango delarik.

Aurten ere, bisitariek sagar prentsaketak ikusteko aurrez izena eman ahal izango dute; eta azken urtetan bezala, Sagardo Asteari hasiera emateko, Gipuzkoako Foru Aldundiaren Sagardo Lehiaketako irabazleei sariak banatuko zaizkie. Igartubeitin, asteburuan, zanpaketak, antzezpenak eta sagar erakusketa izango dira noski, bestelako tailer, bisita edo dastaketek aurtengo egitaraua osatuko dutelarik.

Esan bezala, jarduera honi hasiera emateko, Gipuzkoako Foru Aldundiaren Sagardo lehiaketako irabazleei sariak banatzen zaizkie. Museotik azaltzen dutenez, «gastronomiak programazioan pisu handia izaten du sagarrean oinarritutako tailer-dastaketak Igartubeitiko sagardoaz lagundurik, errezeten lehiaketa eta inguruan bildutako sagar mota ezberdinen erakusketa ere ohikoak bihurtu direlarik egitarauan: argentina sagarra, pinoi, errege gaxie, txori sagarra, mendeun sagarra,madari sagarra eta limoi sagarra, besteak beste». Aste honen altxorra zanpaketak dira, Igartubeitiko dolarea, baserriaren bihotza, mugimenduan ikusteko aukera dagoelarik: pausoz pauso sagarra txikitu, kirikoketaren hotsez, eta beheko solairura erortzen den sagar zuku gozoa dastatzeko aukera ere eskain-tzen digutelarik.

Tailerra

'Sagar tentagarriak' tailerra izango da larunbata honetan arratsaldeko 16:30etik 18:30ak bitartean Igartubeitiko interpretazio zentroan, bertan sei eta hamabi urte bitarteko haurrek beraien gurasoekin batera parte hartzeko aukera izango dutelarik. «Sagarra biltzeko garaia da eta era askotakoak daude: gozoak, gaziak, mikatzak... Nahi al dituzu dastatu eta postre bereziak egin?», luzatzen dute deialdia Igartubeitiko arduradunek.

Tailer honetan parte hartu nahi duten familiek izena emateko epea zabalik dute, honetarako 943 72 29 78 telefono zenbakira deitu edo igartubeiti@gipuzkoa.eus helbide elektronikora idatzi besterik ez da egin behar; garrantzitsua da izena aldez aurretik ematea lekua mugatua baita. Tailerraren prezioa 3eurokoa da pertsona bakoitzeko, Familia Txartelarekin deskontuak egiten direlarik. Tailerra amaitzerakoan merienda goxoak gozatzeko aukera izango dute parte hartzaileek.

Familiei zuzendutako tailer hau irailean zehar egingo den azkena izango da.

Contenido Patrocinado

Fotos

Vídeos