Diario Vasco
Figuranteak. Itsasoko herritar batzuk figurante izan dira.
Figuranteak. Itsasoko herritar batzuk figurante izan dira. / GALILEA

'Errementari' pelikulako eszena batzuk gure elizan

  • Atzoko grabaketetan egun batez aktore izateko aukera izan zuen adin desberdinetako itsasoar talde batek

Paul Urkijo zuzendari eta gidoilari gasteiztarraren 'Errementari' filma grabatzen izan ziren atzo Itsasoko San Bartolome elizan. Araban hasi, Bizkaiara mugitu eta Gipuzkoan Aizpurutxon, Itsason eta Agorregin egingo dute lan, guztira hilabete eta erdiko lana osatuko dutelarik.

Ez da lehenengo aldia pelikula bat grabatzera etortzen direla Itsasora. Koldo Serraren 'Bosque de sombras' (2006), Helena Tabernaren 'La Buena nueva' (2008), eta Aitor Arregik zuzendutako 'Aundiyak' (2016ko apirilan) egon dira Itsason, bertako txoko eta ondarea aprobetxatuz eszena deberdinak bertan grabatu izan dituztelarik. Hauetako batzuetan ere herritarren parte hartzea eskatu izan da eta hantxe murgildu izan dira gazte eta helduek arazorik gabe.

Abenduaren 12an hasi ziren grabaketak eta Euskal Herrian zehar hilabete eta erdi egongo dira lanean, gure herriari dagokionez atzo izan zelarik aukeratutako eguna.

Oraingoan elizaren beharra izan dute artistek. Asteartean hasi ziren prestakuntza lanekin, goizean Itsason elkartu eta San Bartolome elizaren barnealdeko eta erretaulako moldaketekin hasi zirelarik, behar den garaira egokitzeko aldaketak egin, figura batzuk gehitu, kandelak... eta eszenatokia prestatzen aritu ziren lanean gogoz, udaletxeko gelak ere aldagela, material uzte eta behar ziren lanetarako prestatu zituztelarik.

Berriro ere atzeraka salto egin dute itsasoarrek, oraingo honetan egun batean zehar bakarrik ere aurrera eraman direlarik grabaketak. 'Aundiyak'-en gertatu bezala, itsasoar taldetxo batek figurante gisa parte hartu du pelikulan: gaztetxo batzuk, heldu, eta herriko amonak ere topatzen ziren bertan aspaldiko jazkerak soinean.

Jendea gora eta behera, eliza barrutik hotsak, isiltasun eskea... eliz barruko eszenak grabatzen aritu ziren egun osoan zehar, zertan datzan jakinaraztera eman gabe filmaren sekretuak gordetzeko. Beraz, gure herritarrak ikusi, herrian egindako lana ezagutu eta filma honen korapilo osoa ezagutzeko lehen emanaldira itxaron beharko da.

Temas

Recibe nuestras newsletters en tu email

Apúntate