Diario Vasco

'Abere edo animaliak' izango da III. Argazki lehiaketaren gaia

Gaia. Hirugarren edizio honetako gaia «Abere edo animaliak» da.
Gaia. Hirugarren edizio honetako gaia «Abere edo animaliak» da. / GALILEA
  • Hiru kategoriatan banatuko dira parte hartzaileak; lanak otsailaren 5a arte bidali ahal izango dira

Ezkio-Itsasoko leku, txoko, festa, ospakizun edo herriarekin lotutako gaia, eta negu paisaia izan dira orain arte herri mailan aurrera eraman den argazki lehiaketako protagonistak. Aurten hirugarren edizioa aurrera eramango da herrian eta aukeratutako gaia «Abere edo animaliak» dugu, argazki kamera hartu eta otsaila arte argazkiak bota eta lehiaketan parte hartzeko aukera egongo delarik.

Aukera anitz eskaintzen ditu gai honek, baserrietan ditugun animalien irudiak bildu, kaleetan aurkitzen ditugunak, edo zergatik ez, hemendik gutxira ospatuko den Santa Lutzi eguna aprobetxatu eta Zumarragan argazki eder mordo egiteko aukera ere zabaltzen digu gaiak. Dena dela, gogokoa dugun abere edo animalia aukeratu eta honi erreportai txukuna eginez argazki bat edo gehiagorekin parte hartu daiteke aurtengo herriko III Argazki Lehiaketan.

Yartu Kultura elkartearen eta Ezkio-Itsasoko Udalaren eskutik aurrera eramango da lehiaketa, honetan parte hartzeko baldintzak hiru izango direlarik: herrikoa izatea; epe barruan argazkiak entregatzea (2017ko otsailaren 5a baino lehen); eta giza irudiak azaltzen badira, gerora aurrera eramango den erakusketan agertzeko baimena izatea.

Lanak posta elektronikoz edo CD batean grabatuta aurkeztu beharko dira, hurrengo urteko otsailaren 5a baino lehen (igandea), yartuke@gmail.com helbide elektronikora bidaliz edo zuzenean Ezkio-Itsasoko udaletxean utziz.

Oraingoan hiru kategoriatan sailkatuko dira parte hartzaileak: haurrak, 12 urte bitarteko umeak; gazteak, 13-17 urte bitartekoak; eta helduak, 18 urtetik gorakoak.

Aukeraketa

Parte hartu nahi duten herritar guztiek otsailaren 5a izango dute argazkiak bidaltzeko azken eguna eta epe horretatik aurrera argazki onenen aukeraketa egingo da, hau bi eratara aurrera eramango delarik. Alde batetik, lehenengo saria, adituen epaimahai batek erabakiko du; bigarren saridunen izenak berriz, jendearen botuek aukeratuko dituzte.

Azken honetan nahi duen guztiak botoa emateko aukera izango du: aurkeztutako lanak Yartuko blogean (yartu.eus) zintzilikatuko dira eta edonorrek izango du aukera «atsegin dut» bidez argazkirik gogokoena aukeratzeko. Bozka ematea otsailaren 19an hasi eta martxoaren 3an amaituko da.

Epe guztiak amaituta eta sarituen izenak aukeratuta, 2017ko udaberrian ospatuko da herriko Udaletxean sari banaketa, bere garaian zehaztuko den egunean eta orduan. Lehiaketan parte hartu duten argazki guztien proiekzioa ere aurrera eramango da orduan.

Sariak

Kategoria bakoitzeko bi sari egongo dira, esan bezala lehenengoa epaimahai adituak eta bigarrena jendearen botoen bidez aukeratuko direlarik. Lehenengo kategorian (12 urte artekoak), lehenengo saria 50 eurokoa izango da; eta bigarren sari gisa, parte hartu duten guztientzako txokolatada egongo da. Bigarren kategorian (13-17 urte bitartekoak), lehenengo saria 100 euro-koa izango da; eta bigarren sari gisa, bost finalistentzat plater konbinatua herriko ostaturen batean; azkenik, hirugarren kategorian (18 urtetik gorakoak), lehenengo saria 150 eurokoa izango da; eta bigarren sari gisa, bi pertsonentzako afaria herriko ostaturen batean.

Egon daitezken zalantzak argitzeko edo beste argibiderik behar izanez gero, Yartu kultura elkartera idazteko aukera dago, yartuke@gmail.com helbidera.

Recibe nuestras newsletters en tu email

Apúntate