Diario Vasco

Zaporeekin jolasean Sagar Dultze dastaketa tailerrean

Dastaketak. Jolas baten bitartez gozoak zein sagarrekin eginda zeuden asmatu behar izan zuten parte hartzaileek.
Dastaketak. Jolas baten bitartez gozoak zein sagarrekin eginda zeuden asmatu behar izan zuten parte hartzaileek. / IGARTUBEITI
  • Hiru mota gordinik dastatu eta joku baten bitartez, sukaldatu ondoren, hauek ezagutzea izan zen parte hartzaileen helburua

Igartubeiti Baserri Museoko Sagardo Asteko egitarauan barne, Sagar Dultze dastaketa aurrera eraman zen ostegunean arratsaldean, jolas baten bitartez gozoen dastaketak aurrera eraman zirelarik.

Sagardoetxeako Jose Mari Alberrok eta Rafa Gorrotxategik joku bat proposatu zieten bertaratutakoei. «Lehendabizi hiru sagar mota dastatu genituen: Anisa (ezagunagoa Iparraldean), Moko eta Goikoetxe», azaltzen dute Igartubeitiko arduradunek. «Bitartean, Rafa Gorrotxategik labean sartu zituen sable pastaz, krema berezi batez eta hiru motatako sagar horietako batez osatutako dultzea edo gozoa», diote. Adituek proposatu zieten jokoa hurrengo izan zen: gozo bakoitza zein sagarrarekin eginda zegoen asmatzea, elkarrekin komentatuz eta aurretik dastatutako sagarren zaporeak buruan.

«Gehien gustatu zitzaiguna, moko bariedadearekin egindako gozoa izan zen, eta baita anisarekin egindakoa ere; Goikoetxe sagarra gordinik jateko ona zela iruditu zitzaigun baina labean sartuta zaporea galtzen zuela ikusi genuen», diote parte hartzaileek. Hamar bat lagun bildu ziren arratsaldeko tailerrean, eta honekin Sagardo Asteko ekintza bereziei agur esan zieten, atzo goizean azkeneko zanpaketa aurrera eraman zutelarik, hurrengo urtera arte dolarea berriro isilik mantenduz.

Azken txanpa

Ekintza potoloak amaituta egon arren, oraindik egun batzuk daude lehiaketa desberdinetan parte hartzeko. Sagar edo sagardoarekin egindako errezeten lehiaketarako lanak adibidez igandera arte bidaltzeko aukera dago, eta baserriko atarian dauden sagarren erakusketa ere egun batzuetan zehar izango dugu oraindik.

Recibe nuestras newsletters en tu email

Apúntate