Diario Vasco

Ingelesa ikasi eta praktikatzeko aukera eskaintzen da Itsason

Xaboia. Xaboi ekologikoa egiten ikasten aritu izan dira Itsason.
Xaboia. Xaboi ekologikoa egiten ikasten aritu izan dira Itsason. / I.A.B.
  • 'Tailerrak herri ekimenez' egitasmoaren barne kokatzen da jarduera berri hau

Lau urte badira elkarrekin eginez eta ikasteko interesarekin 'Tailerrak herri ekimenez' egitasmoa sortu zela Itsason eta hilabete honetan honen barruan kokatzen den ekintza berri bat jarriko da martxan, ingelesa ikasi eta praktikatzeko aukera eskainiz. Orain arte xaboi ekologikoa nola egiten den prozesua ezagutu, ukenduen tailerra edo hegaluzea poteratzen ikasteko tailerrak aurrera eraman izan dira herrian eta oraingoan, Atlantatik etorritako familia bat herritarren artean dagoela aprobetxatuz, beraien hizkuntza ikasi eta praktikatzeko aukera egongo da Itsason.

Jennifer Willis Atlantatik Itsasora etorri berria den herritarra dugu, eta bere laguntzaz astean behin, ordu eta erdiz, edozein ingelesa maila izanda ere, hau hobetzeko aukera zabaltzen da. Hau guztia antolatzeko, urriaren 11n 18:00etatik 19:30era lehen bilera eta saioa aurrera eramango da herrian. Interesa duten guztien artean baldintzak adostu eta ikasturteari hasiera emango zaio.

Saioak Itsasoko eskola zaharrean izango dira, dagoen ekipamenduaz eta azpiegituraz baliatzeko, hau da, proiektorea, edo bideo eta home-zinema, besteak beste. Beraz, ingelesa ikasi eta praktikatu nahi duten herritarrek ez dute kanpora joan beharrik, zuzeneko klaseak jaso-tzeko aukera bertan izanik.

Ekintzak

Tailer desberdinak aurrera eraman dira Itsason, hauen artean xaboi ekologikoa egiten ikasi dutelarik. Lehenengo aldiz, Gabiariako Pake Galdosekin aritu ziren herritarrak, eta aurrerantzean antolatutako tailerretan elkarrekin praktikatzeko asmoarekin aurrera eraman dira.

Ukenduei dagokienez, interesa sortu zen eta herrian, baten bat egiten dakitenekin hitz egin, eta elkarren arteko topaketa suertatu zen, era askotako ukenduak eginez. Honetarako prozesua hasieratik egin zen ere, landareak eta loreak biltzera joan zirelarik: berbena, pasmo belarra, kalendula (aingeru lorea), hiperikoa, intsusa, iodo belarra ...

Azkenik, hegaluzea poteratzeko ikasteko ere bildu izan dira itsasoarrak, Rosario Mintegik emandako aholku eta jarraibideei esker 55 kilo 210 potetan sartu zituztelarik. Bigarren topaketan berriz Xabier Elgarrestaren laguntza (Rosarioren semea) izan zuten herritarrek. Bai batan bai bestean hamalau familiek parte hartu zuten, amaitzerakoan afari ederraz gozatuz.

Recibe nuestras newsletters en tu email

Apúntate