Diario Vasco

Pilota partidak, dantzariak eta herri afaria gaur Ugarteko festetan

Gaur goizeko 10:30erako iragarri dituzten kanpai-jotze eta suziriekin hasiko dira Ugarteko Errosarioko Amaren jaiak. 11:00etan meza nagusia ospatuko dute, segidan gaztetxoen pilota partidak izango dira ikusgai eta bazkal aurretik trikiti doinuak izango dituzte lagun Izer eta Alabierrekin. 17:30ean Alegiako Sutarri dantza taldeak emanaldia eskainiko du eta 21:00etan herri afaria egingo da. Erromeri garairako Izer eta Alabier gertu izango dira berriz ere, eta trikitilarien atsedenaldian toka txapelketa jokatuko da.

Bihar puzgarriak eta beste hainbat jolas izango dituzte txikienek: goizez 12:00etatik 14:30era eta arratsaldez 16:30etik 19:00etara. Horrez gain, arratsaldean zaldian ibilalditxoak egiteko aukera ere izango dute eta askaritarako txokolatea eta bizkotxoak prestatuko dizkiete. 21:00etan zahagiardoa ospatuko da eta 22:30erako Ansorregi eta Larrañagarekin erromeria dago iragarrita.

Etzi goizeko meza nagusiaren ondoren txakolin probaketa ospatuko da plazan, pintxorik ere izango da ahora eramateko, eta bazkal aurrerako zein arratsalderako Lajaren trikiti saioa dago iragarrita. 18:00etan hasiko da Aimar Irigoien harri-jasotzailearen eta Ugaitz Mugerza eta Mikel Larrañaga aizkolarien saioak bilduko dituen herri kirol jaialdia, eta ondoren Ingurutxoa dantzatuko dute ugartearrek. 20:30ean sagardo probaketa egingo da eta Lajaren trikiti doinuekin bukatuko dira 2016ko Ugarteko Errosarioko Amaren jaiak.

Recibe nuestras newsletters en tu email

Apúntate