Diario Vasco

IBI-a eta zaborren zerga izan ezik beste guztiak berdin geratzen dira

Bilkura. Asteazkenean egin zen Ezkio-Itsasoko udaletxean.
Bilkura. Asteazkenean egin zen Ezkio-Itsasoko udaletxean. / GALILEA
  • Sasietak prebisio bat bidaltzea espero du Udalak; momentuz ez dakite zaborren tasa nola aldatu daiteken

Ezkio-Itsason izandako azken ezohiko Udal osoko bilkuran gai ezberdinak jorratu ziren, hauen artean hurrengo urteko zerga eta tasen prezioei buruzkoak.

Herri Bide Publikoen Inbentarioari hasierako onarpena eman zioten lehenengo gai gisa eta jendeaurreko epealdian jartzeko proposamena onartu zuten ere. Aho batez baietsi zen, orain buletin ofizialean argitaratu eta alegazioak egiteko momentua iritsiko da. Aurreko urtean Ezkio-ltsasoko Udalak bide publikoen inbentario lana egiteko erabakia onartu zuen, hau Gaizka Perosterena arkitektoa eta Estibaliz lgartua aparejadoreari enkargatuz. Dagoeneko lana amaituta dago, eta prozesua bide administratiboa har-tzearekin batera, herritarrekin ere bilerak antolatu dira, honen inguruan egon daitezken zalantzak argitzeko. Lehenengoa urriaren 5ean, asteazkenean, 19:00etan aurrera eramango da Itsasoko ostatu gaineko gelan; bigarrena, berriz, urriaren 6an, ostegunean, 19:00etan hasiko da udaletxeko batzar aretoan.

Jarraian, herri txikietara zuzendutako Gipuzkoako Haur eta Gazteen sustapen programaren inguruan adostutako aldarrikapena onartu zuten aho batez.

Azken urteetan zerga eta tasak mantendu izan dira orokorrean herrian eta hurrengo urteari begira ere horrela egingo duela azaldu zuen udalak azken bilkuran.

Hirugarren puntu gisa, 2017. urterako zerga eta tasen prezioak eguneratzeko espedientea aztertzeari ekin zioten. IBI eta zaborren tasan egongo dira aldaketak Ezkio-Itsasori dagokionez, beste zerga eta tasa guztiak aurten bezala mantenduko direlarik. «Planteamendua da, aurreko urteetan bezala, dagoena mantentzea, Sasieta alde batera utziz, bertatik etortzen dena ikusi beharko dugulako. Momentuz Sasietari dagokionez ez dakigu ezer, suposa- tzen da prebisio bat bidaliko dutela baina momentuz itxaron behar dugu», azaldu zuen Garikoitz Aiesta alkateak. «Zaborren kasuan ere, hurrengo urteari dagokionez, Ezkio eta Itsaso bakoitza bere alde aztertu beharko du gaia».

Katastroa eguneratu

Bestetik IBI delakoa dugu. 2014. urteko azaroan Gipuzkoako Diputazioak katrastroa eguneratu behar zuelaren albistea jasotzen genuen, hauek 2001ean azken aldiz eguneratuak izan zirelarik. Aurreko urtean hasi eta dagoeneko balorazioa eginda dago, datuak hemendik gutxira jakingo direlarik. «Diputazioak balorazioa egin du. Ezkio-Itsason, etxebizitzetan praktikoki berdin mantentzen da, eta industrian dago igoera. Datuak Diputazioak eta udalaren sinadurarekin etxeetara bidaliko dira», azaldu zuten bilkuran.

Recibe nuestras newsletters en tu email

Apúntate