Diario Vasco

'Soineko paisaia' artxiboaren aurkezpena bihar Igartubeitin

Artxiboa. Soinu artxibo berri baten aurkezpena bihar Igartubeitin.
Artxiboa. Soinu artxibo berri baten aurkezpena bihar Igartubeitin. / GALILEA
  • Larunbatean inauguratu eta abenduaren 18ra arte izango dugu Igartubeiti Baserri Museoan

Martxa gogoz hartu dute Igartubeitikoek hilabete honetan eta asteburuari dagokionez ekintza desberdinak aurrera eramango dira, ohiko bisitaz gain: «Soineko paisaia» soinu artxiboaren aurkezpena eta familien topaketa eta tailerra izango ditugu larunbatean Ezkio-Itsasoko altxor honetan.

«Soineko Paisaia» (2009-2015) Gipuzkoako ehun burutik gorako artaldeen zintzarri hotsen artxiboa dugu. Proiektu hau Nader Koochakik burutu du eta inaugurazioa larunbatean eguerdian aurrera eramango da, honetan Koochaki bera Igartubeitiko interpretazio zentruan egongo delarik bere lana aurkezten.

Ehun burutik gorako Gipuzkoako artaldeen zintzarri hotsen soinu artxibo bat da Soineko Paisaia, 2008an abiatu eta, orain arte, ehun soinu grabaketa inguru bildu dituena. Grabaketa bakoitza, landa-laneko ohar koaderno baten gisan, fitxa banarekin osatzen da. Fitxa horietan, artzaina eta artaldea identifikatu, lokalizazioaren berri eman, grabaketa baldintzak aipatu eta egoeraren eta gaiaren gogoetak txertatzen dira.

Egitasmo hau, Gipuzkoako Foru Aldundiaren laguntzarekin, artzaintzaren gaia jorratzeko, 2008. urtean zabaldutako lan-ildo zabalago baten parte da. Lan-ildo hori adarkadura nagusi bik egituratu zuten, artzaintzaren jarduera, pentsamendu mendebaldarraren oinarrizko eskemaren eredu gisa hartuz (subjektu-bitartekari-objektu hirukoa) eta euskal kulturaren irudi esanguratsu bezala.

Urteotan jasotako materialek erakusten dute artzaintzaren jarduerak, agente gisa, Gipuzkoako soinu paisaiaren ehuntzean duen eragina. Fenomenora gerturatzeko erabilitako metodologiak berriz, Aktore Sarearen Teoriaren ildotik (ingelerazko ANT), paisaia, artea eta gizarte zientziak eraiki eta irakurtzeko modu propioa proposatzen du. Gogoeta eta landa lanek entsanblaia eragiketa bati bide utzi diote orain, kontsultatu zein eraldatu daitekeen forma eta eduki bat jendartearen eskuetan utziz.

Erakusketak Gordailuatik, Gipuzkoako Foru Aldundiko Kultur Ondare Higigarriaren Zentrotik ekarritako zortzi zintzarrien bilduma elkartzen du. Hau guztia larunbatetik abenduaren 18ra arte egongo da Ezkio-Itsasoko Igartubeiti Baserri Museoan.

Egilea

Nader Koochaki (1983, Donostia) soziologian lizentziatua da eta 2008 urtetik aurrera artearen alorrean garatu du bere lana. Bideoaren, argazkiaren eta soinuaren alorrean ekarpen nabarmenak egin ditu. Orain arte, Naderren lanak ondorengo lekuetan erakutsiak izan dira: Arteleku, Arabako Lurralde Historikoaren Artxiboa, Donostiako Cristina Enea Fundazioa, Bilboko Bizkaia Aretoa, Egiako Kultur Etxea, Miarritzeko Mediateka, Baionako Euskal Museoa, Bilboko Club Le Larraskito, Bartzelonako Antoni Tàpies Fundazioa, Gasteizko Artium Museoa, Dubaiko MOP, Londreseko Edge of Arabia eta Donostiako Tabakalera. Artista desberdinekin kolaborazio lanak ere egin ditu.