Diario Vasco

Txintxarri eta Txintxarri Txiki abesbatzek gaur hasiko dute ikasturte berria

XAlegiako Txintxarri eta Txintxarri Txiki abesbatzek gaur, ostegunarekin, egingo dituzte 2016-2017 ikasturteko lehen entseguak: 19:30etik 20:30era gaztetxoek eta 21:00etatik 22:30era helduek.

Aurten ere Garbiñe Orbegozoren zuzendaritzapean ariko dira bi abestaldeak. Urriaren 15ean ospatuko den Txintxarri Eguna prestatzea izango dute zeregin nagusia ikasturte hasiera honetan. Gainera, egun horretan bertan Palentziako Dueñas herriko Castilla Vieja abesbatzaren bisita jasoko dutela jakinarazi dute Txintxarri abesbatzako ordezkariek.

Txintxarri eta Txintxarri Txiki abesbatzetako kideek eurekin batera koruan abesteko gonbita luzatu diete alegiarrei zein kanpoko herritarrei.

Interesa dutenek Alegiako Inaxio Begiristain kultur etxean euren datuak utzi edota abesbatzako kideren batekin harremanetan jarri besterik ez dute. Aurten Txintxarri Txikin abestuko duten haurren adin tartea zabaldu egin du abesbatzak: zazpi urtetik hamasei urte bitarteko gaztetxoek abestu ahal izango dute koruan.