Diario Vasco

Sagar edo sagardoarekin egindako errezeten lehiaketa abian da

Sagarrak. Jakoba Errekondorekin sagarrak dastatzen aurreko urteko Sagardo Astean.
Sagarrak. Jakoba Errekondorekin sagarrak dastatzen aurreko urteko Sagardo Astean. / IGARTUBEITI
  • Ostiralean irekiko da parte hartzeko epea eta hilabete batean zehar errezetak bidaltzeko aukera egongo da

Aurten ere Sagardo Astea egingo da Ezkio-Itsasoko Igartubeiti Baserri Museoan eta honen inguruko prestakuntza guztiekin hasi dira dagoeneko, hauen artean egitarauan ohikoa den sagar edo sagardoarekin egindako errezeten lehiaketa kokatzen delarik.

Urrian egiten du Igartubeiti baserri museoak sagardo astea urtero, bertako dolarea martxan jarriz eta sagardoa egiteko orain dela 500 urte erabiltzen zen teknika erabiliz. Oraingoan urriaren 5ean hasi eta 14ra arte aurrera eramango dira ekintzak, batzuk urtetan zehar egitarauan finkoak bilakatu direlarik, hauen artean errezeta lehiaketa azpimarratuz. Festa giro ederra sortzen da egun hauetan Igartubeitin: sagar usaia nonahi eta baserria benetan bizirik ikusteko aukera zabaltzen digute, antzezpenak eta kirikoketa ere ez dira falta, herritarren parte hartzea eta adituen tailerrak edo hitzaldiak. Aurten ere egitarau dotorearekin datoz eta nahiz eta jarduera gehienak urriaren 5etik aurrera izan, ostirala honetan hartuko du lehenengo ekintzak martxa.

Lehiaketa

Formatu desberdinak izan ditugu azken urtetan zehar, sariak aldatuz joan dira eta lortutako errezetekin ere liburua bat osatu dute Igartubeitin. Oraingoan ere ekintza honekin aurrera egingo dute baserrikoek, bertan parte hartzeko aukera ostirala honetan zabaltzen delarik eta hilabete oso batean zehar luzatuz.

Aurten, errezeta idatziz bidaltzeaz gain, errezetaren argazkia bidaltzea ere eskatzen diete parte hartzaileei Igartubeitikoek, bai bata bai bestea igartubeiti@gipuzkoa.eus helbidera bidali behar direlarik.

Sari gisa, errezeta eta argazkia bidaltzen duten parte hartzaile guztien artean, bi pertsonentzako sagardotegi menuaz osatutako bazkaria edo afaria zozketatuko dute.

Errezeta eta honen argazkia bidaltzeko epea ostiral honetan hasi eta urriaren 16ra bitartean zabalik egongo da. Lehiaketa hau Ezkioko Argindegi Ostatuaren babesarekin antolatu da.