Zumaiakori azken minutuan irabazi eta Azpeitira joateko autobusa jarri du AKEk

Preferente mailako Antzuolak puntu bakarrera du denboraldiko helburu nagusia. / AKE
Preferente mailako Antzuolak puntu bakarrera du denboraldiko helburu nagusia. / AKE

Markel Leteren golak eman zion 3-2 garaipena etxeko taldeari, baina oraindik ez du ziurtatu mailari eustea

JOSEBA LEZETA ANTZUOLA.

Markel Letek 90. minutuan sartutako golari esker hiru puntuak Eztalan geratu ziren zapatu arratsaldean. Igor Larreak zuzendutako futbol taldeak 3-2 irabazi zion Zumaiakori, bigarren zatia aurrera doala 0-2 atzetik baziren ere. Pil-pilean egon zen neurketa azken unera arte.

Kanpokoak 0-1 aurreratu ziren lehen zatian eta bigarrena ere sartu zuten atsedenaldiaren ostean. Hiru puntuek Antzuolatik ihes egingo zutela ematen zuen. Baina azken ordu laurdenean irauli egin zuten markagailua. Beteranoen golak heldu ziren. Ander Aranarena, 74. minutuan; Josu Zubikarairena, bi geroago, 76.ean; eta Markel Leterena 90.ean, ia bukatzear.

Poza lehertu zen zelaian zein zelaitik kanpo. Zoramena. Jardunaldi bat falta eta 12. postura igo da An-tzuola sailkapenean. Baina oraindik airean dago mailari eutsi ala ez. Jaitsiera zuzena saihestu du, hiru puntura duen Aretxabaletak baino average hobea duelako. Baina promozio lekuan den Bergara puntu bakarrera da.

Jokalariei lagundu eta babesa emateko, Antzuola Kirol Elkarteak zaleentzat autobusa antolatu du Azpeitira joateko. Badirudi zapatuan jokatuko dutela Ikasberri aurkari zuzenaren kontra. Printzipioz, berdinduz gero, maila berean jarraituko du Antzuolak. Autobusak eserleku mugatuak ditu eta izena emateko azken eguna bihar da, eguaztena. Zuzendaritza batzordeko kideek hartzen dituzte izenak.

AKEko beste taldeei dagokienez, igoera faseko jubenilek 4-0 galdu zuten Hondarribian. Eta infantilek lehen postuan bukatu dute Kopa Aretxabaletan UDA Ari 3-6 irabazi eta gero. Oier Aranburuk lau gol sartu zituen; Adiran Askasibarrek eta Oier Sotok, berriz, bana.

Temas

Zumaia

Contenido Patrocinado

Fotos

Vídeos