Nerabeei buruzko hitzaldia emango dute gaur, Kilometroak jaialdiaren harira

Kontsumo arduratsuari buruz jardungo dira Agipad elkarteko teknikoak

M.G. OÑATI.

Aurtengo Kilometroak azken txanpan sartuta dago eta festarako motorrak berotze aldera, datozen egunetarako ekintza desberdinak antolatu ditu Txantxiku Ikastolak: hitzaldia, Reala eta Osasunaren arteko futbol partida, mendi martxa...

Geroz eta gutxiago geratzen da irailaren 24rako. Egun handirako. Dena den, aste honetan oraindik badago zertaz gozatu. Gaur, asteazkena, Kilometroetako preben-tzio taldeak hitzaldia antolatu du Agipad elkartearekin batera. 'Neraberak eta aisialdia, gurasoen jarrera' da hitzaldiaren izenburua eta kontsumo arduratsuari buruz jardungo dira elkarteko teknikoak. Herritar guztiendako hitzaldi irekia izango da, Bidebarrietako Euskaldunberri gelan, 17:30ean.

Ostiralean berriz kirolaren txanda izango da. Emakumezkoen futbol partida jokatuko dute Realak eta Osasunak, Azkoagainen, 18:30ean. Txartelak leihatilan bertan erosi behar dira, norgehiagoka hasi baino ordubete lehenagotik (17:30ean). Helduek 10 euro ordaindu behar dute, eta, 15 urtetik beherakoek, 5 euro.

Bestalde, larunbatean, Oñatiko Naturzale taldeak antolatuta mendimartxa egingo da. Izen-emate bakoitzeko euro bat emango zaio Kilometroetako antolakuntzari. Gainera, Foruen plazan anoa postua egongo da, jatekoarekin eta edatekoarekin. Kilometroetako arduradunek kudeatuko dute txosna.

Jasangarritasuna

Azkenik, eta aurtengo Kilometroek jasangarritasunarekin duten konpromisoaren berresteko, asteburutan Oñatiko plazan eta inguruetan lurrera botatzen diren hondakinen kontzientzia hartzeko ekintza aurrera eramango da. Honela bada, Kilometroen aurreko asteburuan, udaleko garbitzaileek Oñatiko plaza ingurua ez dute garbituko. Asteburuan lurrera botatako hondakinak Txantxiku Ikastolako ikasleek bilduko dituzte. Jasotako hondakin guztiak kaxa garden batera botako dira, eta kaxaerakusgai jarriko da plazan eta Kilometroetako egunean ere ibilbidean zehar ikusgai egongo da.

Antolatzaileen esanetan «ekin-tza honen bitartez, jendeari ikusarazi nahi zaio edukiontziak edukita ere ohitura handia dagoela hondakinak lurrera botatzeko, eta hori aldatu beharra dagoela».

Fotos

Vídeos