Futbitoko 24 orduak gabonetatik udaberrira arte atzeratu dituzte

Futbol talde nagusia azken-aurrekoa da sailkapenean. / AKE
Futbol talde nagusia azken-aurrekoa da sailkapenean. / AKE

Futbol talde nagusiak 2-3 galdu eta hiru txartel gorri ikusi zituen Beasain Bren aurkako neurketan

JOSEBA LEZETA ANTZUOLA.

Gabon bezperan, hilaren 23an, frontoian egitekoa zen Futbitoko 24 orduen edizio berria bertan behera geratu da. Antzuola Kirol Elkarteko iturriek diotenez, «egun horretan futbol talde nagusiak ligako partida du. Bere zenbait kidek 24 orduetan parte hartzen dutenak dira eta aproposagoa ikusi dute beste data baterako lagatzea». Udaberri aldera egitea da asmoa. Asteburu aproposa aurkitu beharko dute.

Kontuan hartu behar da, baita, abenduko azken astean, 26tik 31ra -hau da, martitzenetik domekara-, pilotako Debagoieneko Gabon Kopa egitekoa dela frontoian. Beraz, gabonetako aste horretan ez zegoen gau eta egun osoko iraupena duen Futbitoko 24 orduak egiterik. An-tzuolako eta eskualdeko beste herri batzuetako pilotari alebinak eta infantilak ariko dira Gabon Kopan.

Bestalde, zabalik dago abenduaren 26ko San Esteban kroserako izena emateko epea. Liburudendan, liburutegian eta udaletxean hartzen dituzte. Hiru maila bereizi dituzte antolatzaileek adinaren arabera: bost eta zortzi urte artekoak; benjamin, alebin eta infantilak elkarrekin; eta, bukatzeko, kadete mailatik gorakoak.

Arratsaldeko bost eta erdietan hasita, hiru lasterketa jokatuko dira, bat maila bakoitzeko.

Berotuta Eztalan

Futbol talde nagusiak 2-3 galdu zuen bere azken neurketa, Beasain Bren aurkakoa. Txartel zaparrada izan zen eguen arratsaldean Eztalan: hiru gorri eta beste zazpi hori ikusi zituzten etxekoek.

Facun Giménez eta Oxel Erostarbe bina hori erakutsi ondoren kaleratu zituen epaileak. Igor Larrea entrenatzaileari zuzenean gorria atera zion neurketa bukatzeko oso gutxi falta zela. Bigarren prestatzaileari eta delegatuari ere kargua hartu zien.

Ander Aranak eta Aitor Alonsok sartutako golak ez ziren nahikoa izan eta Antzuola azken-aurrekoa da sailkapenean.

Contenido Patrocinado

Fotos

Vídeos