San Esteban krosak dozenaka korrikalari bilduko ditu etzi arratsaldean

Korrika. Iazko San Esteban kroseko parte-hartzailea, irteteko gertu. / JABI ETXANIZ
Korrika. Iazko San Esteban kroseko parte-hartzailea, irteteko gertu. / JABI ETXANIZ

Eskolako ikasleek kalejira egingo dute gaur gurasoekin eta Mari Domingi zein Olentzero San Josetik jaitsiko dira

JOSEBA LEZETA ANTZUOLA.

San Esteban krosak herriko korrikalari ugari bilduko ditu etzi, martitzena. Arratsaldeko bost eta erdietan hasita, hiru saio jokatuko dira. Adinaren arabera banatuko dira parte-hartzaileak. Bost eta zortzi urte bitartekoak ariko dira lehenik. Ordu laurden geroago, 17:45ean, benjamin, alebin zein infantilen txanda izango da. Seietan, azkenik, kadete mailatik gorakoak abiatuko dira, ibilbide luzeagoan.

Liburudendan, liburutegian eta udaletxean hartu dituzte izenak abendu hasieratik. Orain arte eman gabekoek, dena den, krosa hasi baino ordu erdi aurretik izango dute aukera. Bost euro ordainduz, hori bai.

Hirugarren edizioa du aurten 2015ean martxan jarri zen San Esteban krosak. Ibilbide errazekoa, harrera ona du antzuolarren artean. Hainbat adineko lagunak biltzen daki.

Olentzero eta Mari Domingi

Gabon giroa nabarmenduko da gaur Antzuolako kaleetan goiz-goizetik. Hamaiketan bilduko dira umeak Errekalde auzoan, kanturako gertu. Euria bada, bilgunea eskolako patiora aldatuko dute. Kalez kale haruntz eta honuntz ibiliko dira gabonetako abestiekin.

Arratsaldean, seietan, Mari Domingi eta Olentzero San Josen behera jaitsiko dira laguntzaileekin. Herritarrak zain izango dituzte Eguzki auzoan eta ekitaldi nagusia, berriz, Herriko plazan egingo dute.

Contenido Patrocinado

Fotos

Vídeos