Diario Vasco

Kilometroak festarako atzerako kontaketa hasi da

Gorriti, Aranzadi ikastolako ikasleekin.
Gorriti, Aranzadi ikastolako ikasleekin.
  • Antolakuntzak dei egin du igandean garraio publikoa edo txirrindula erabiltzea Bergarara joateko, izan ere, jende mordoa espero dute egunean zehar

Euskararen alde urtero egiten den festarako atzerako kontua hasi da dagoeneko. Igande honetan Bergarako kaleak ondo pasa nahi duten pertsonaz beteko dira. Neskak, mutilak, gurasoak, gazteak, helduak... Denetarik egongo da Kilometroak jaiean.

Jende asko espero denez, Kilometroak 2016ko antolakuntzak dei egin du igandean garraio publikoa erabiltzeko Bergarara joateko. Eta Debarroko biztanleak bizikleta erabiltzera gonbidatu ditu. Azken honi dagokionean, hitzorduak egin dituzte Arrasate, Oñati eta Antzuolan. Bergaran, bizikletentzako gune bereziak egokitu dituzte herriaren iparraldeko eta hegoaldeko sarreretan: Agorrosinen eta Labegaraietan.

Osteratzean, Pesak eta Lurraldebusek indartu egin dituzte bus lineak. Asko izango dira, bestalde, bus antolatuetan joango direnak. Horientzako Labegaraietan egokitu da aparkaleku handia. Sarrera horretatik igaroko dira zirkuitura autobus antolatuetan datozenak. Bestalde, auto-karabanentzako gunea jarri da Amillagako Eroskiko aparkalekuan.

Autoentzako aparkalekuak, berriz, Amillaga, Antxiturri eta San Lorentzoko industriaguneetan egongo dira. Horiek betez gero, Larramendikoa erabiliko litzateke eta zirkuitura joan-etorria egiteko bus lantzaderak erabili.

Argazki-rallya eta Gorritiren erakusketa

Ekintza mordoa antolatu dira egun handirako, argazki-rallya da horietako bat.

2016ko Kilometroak jaiaren 'Aztarna Solidarioa' aurkitzeko helburuarekin, Kilometroak egunean argazki-rallya egingo da Bergaran. Parte hartzeko izena aldez aurretik eman daiteke, edo, bestela, egunean ibilbidean bertan. Argazki digitalak ateratzeko gailua ere behar da, parte hartzeko euskarri digitalean aurkeztu beharko dira-eta argazkiak.

Hiru sari banatuko dira, hiru argazki onenentzako.

Eta ez hori bakarrik. Kolorez pintatu dute ikastola Aranzadiko ikasleek, Juan Gorritiren laguntzarekin. Eta Pirritx eta Porrotx ere margo-festara batu dira. Donostiako Miramar Jauregian eta ondoko lorategian udan ikusgai izan den 'Aralar Itsasmira' erakusketaren artelanak Bergaran daude orain, Kilometroak 2016ri artista nafarrak egin dio ekarpen erara.