Trikitixa Eskolak ateak irekiko ditu irailaren 15ean edonork jo dezan

Kalejira. Trikitixa Eskolako ikasleak aurtengo San Juan jaietan egin zuten kalejira batean./OLIDEN
Kalejira. Trikitixa Eskolako ikasleak aurtengo San Juan jaietan egin zuten kalejira batean. / OLIDEN

Ekitaldi partehartzailea Herriko plazan egingo da arratsaldez, panderogile artisaua, jolasak eta Trikigin txapelketarekin

KEPA OLIDENARRASATE.

Trikitixa eta panderoen doinuek Herriko plaza beteko dute irailaren 15ean arratsaldez. Hasiera batean hilaren 8rako antolatuta zegoen ekitaldia astebete atzeratu behar izan dute Merkemerkaua stock azokarekin eta larunbatean irekiko den Erdi Aroko feriaren prestaketa lanekin ez topo egiteko.

Trikitixa Eskolak ate irekien eguna ospatuko du 18:00etatik 21:00etara kalejira jendetsu batekin hasita. Eskolako ikasle eta irakasleek instrumentuak kalera aterako dituzte beraiek jotzeko eta baita ere nahi duen edonork jo dezan. 18:30ean trikitixa eta panderoekin 'hartu-emana' sustatu nahi dute herritarrengan. Nahi duenak jotzeko aukera izango du eta bertan izango dira ikasle eta irakasleak zalantzak eta ikasteko metodoari buruzko xehetasunak argitzeko.

Horrekin batera, Trikitixa Eskolako ikasleek 'gurozuna jo' saioaren protagonistak izango dira. Ekitaldi libre honetan ikasleek nahi dutena jo dezakete, bai banaka, binaka edo taldeka.

Zer entzuteaz gain, egongo da zer jan eta zer edan plazan: pintxoak, sagardoa eta ardoa egongo dira salgai ikasle eta gurasoek jarriko duten tabernan.

Kike Rodriguez Altzon bizi den dulantziar panderogile artisauak erakustaldia eskainiko du eta umeentzako puzgarriak eta tailerrak egongo dira Txatxilipurdiren eskutik.

Jakina, datorren ikasturterako Trikitixa Eskolan matrikula egiteko aukera ere izango da bertan.

Trikigin txapelketa

Hirugarren urtez Trikigin gin-tonikak prestatzeko erakustaldia hasiko da 18:30ean. Herriko tabernariek, beraien artean lehiatuz, gin-tonika prestatzen erakutsiko dute eta epaimahai batek edari onena sarituko du. Iazkoan 9 tabernariek parte hartu zuten eta Kajoi atera zen garaile. Errezeta bera erabiliz, parte-hartzaile bakoitzak 4 gin-tonik prestatuko ditu: bat epaimahaiarentzat eta gainerakoak antolatzaileek saldu egingo dituzte.

Fotos

Vídeos