Bide hori elkarrekin egin 'geike'

Mural kolektiboa. Euskararen egunaren atarian hainbat ekitaldi antolatu dituzte Arrasaten. /  OLIDEN
Mural kolektiboa. Euskararen egunaren atarian hainbat ekitaldi antolatu dituzte Arrasaten. / OLIDEN

Arrasateko Euskalgintzak «urrats garrantzitsuak» agindu ditu datorren urterako

KEPA OLIDEN ARRASATE.

Datorren igandean, abenduaren 3an, Euskararen Nazioarteko Eguna dela eta, egunotarako hainbat ekimen antolatu ditu Arrasateko Euskalgintzak.

'Geike' izen berriarekin bataiatu dute Arrasateko Euskalgintza eta bere logo berria ezagutzera emateko mural kolektibo bat margotzen ari dira Zaldibarren. Udaltzaingoa, Txatxilipurdi Elkartea eta Ereindajan pareko parkean dagoen garaje batean ari dira burutzen mural hau atzo hasi eta bihar ostiralera arte. Arrasate Herri Eskolako ikasleek ekin zioten atzo lanari eta gaur eta bihar bitartean Geike-ko gainerako eragileek hartuko dituzte pintzelak: Ekin; Emun; Udal Euskaltegia; Goiena; Txatxilipurdi; Euskal Herrian Euskaraz; Arrasateko Udala; Arrasate Institutua; AEK; Arizmendi Ikastola; Mondragon Unibertsitatea, eta AED.

Bihar ostiralean, hainbat ikastetxetan ekintza bereziak egingo dituzte, tartean euskararen egunerako kaxez osatutako horma irudiak. Euskaltegietan ere izango dute zer ospatu; AEKn 'euskara gehiago egiteko zer egin geike' esaldiak-konpromisoak landuko dira klaseetan eta gero txapak egingo dituzte, horiek aldarrikatzeko. Bestalde, ludoteketan altxorraren bila ibiliko dira herriko kaleetan zehar eta txokolate beroa hartuaz amaituko dute eguna.

Arratsaldeko 18:30ean Zahar Berriren 20. urteurrena ospatzeko ekitaldia egongo da Kulturaten. Ekitaldi umoretsua izango da, urte hauetan zehar mintzapraktiketan ibilitakoak omentzea helburu izango duena.

Larunbatean, Gaztetxokoetako nerabeek arratsalde osorako egitaraua antolatu dute Zaldibarrren (Udaltzaingoa, Txatxilipurdi eta Ereindajan aurreko parkean. Euria eginez gero Biteri plazan». Urban festa! izena duen ekitaldiaren aurkezpena 17:00etan egingo da. Ondoren 17:30ean 'Parkour' erakustaldia izango da; 18:00etan Bokabeats Beatbox komedia, eta iluntzeko 19:00etan DJ Aimar.

Igandekoa izango da ekitaldi nagusia. Euskararen nazioarteko egunaren egitaraua 11:00etan irekiko da scooter txapelketarekin; 12:30ean Konpartsarekin eta gaiteroekin kalejira aterako da Seberotik; 13:00etan bertso-rap emanaldia egingo dute Aneguria eta Oihana Aranak. 13:30ean Euskararen Plazaren inagurazio ekitaldia egingo da aipatu Zaldibarko tokian.

Arrasateko Euskalgintza-Geikek indarrak bildu nahi ditu «aurrerantzean elkarrekin erronka berriei aurre egiteko».

Arrasate euskaldunago bat nahi dute eta 2018an norabide horretan «urrats garrantzitsuak ematera» doazela agindu dute. Euskal hiztunen aktibazioa helburu, 'Euskaraldia 11 egun euskaraz' ekimena abiatuko dute.

«Bide hori elkarrekin egin 'geike'», haurrekin, gazteekin, helduekin, euskaratik gertu eta horren gertu ez daudenekin... horretarako lehenengo pausuak aste honetan bertan emango dituzte.

Contenido Patrocinado

Fotos

Vídeos