Diario Vasco

Aramaioko udal gobernuak «ez du EAJren proposamenik onartu» aurrekontuetan

Aramaion onartu berri den 2017ko aurrekontuak ez du EAJren udal taldearen aldeko bozka izan. Aramaioko EAJko udal taldea osa-tzen duten zinegotzien ustez, Aramaioko Udal gobernuaren aurrekontu-proposamena berandu etorri da. «Lehen aurrekontu-zirriborroa martxoaren 9an ezagutu genuen. Eta etorri ere, akatsez josita eta arrapaladan etorri» zela azaldu dute. Hiru aste baino ez ziren igaro lehen zirriborroaren aurkezpen-egunaren eta onarpen-egunaren artean. Bada, era berean, esan beharrekorik jeltzaleen ustetan: «txikikeria batzuk izan ezik, gobernu-taldeak ez du EAJ taldearen proposamenik gogoan hartu eta onartu».

EAJ-ren proposamenak

Besteak beste, EAJk honako hauek proposatu zituen: udalerrian dauden txabolen zerrenda egitea, jarraian legeztatu eta zelan jokatu erabakitzeko; hiriaren antolakuntza-plana eta PERIa bukatzea; Mendixola Zentroaren dinamizazioari behingoz ekitea; udal jabetzapekoak diren basoen ganadu eta baso-erabilera aldi berean egitea; genero-indarkeriaren arrisku posibleak ekidite aldera burutu beharreko ikerketa egitea; Ibarran eta, batez ere, Aramaioko auzo guztietan desfibriladoreak jartzea; ura eta hondakinak fakturatze aldera egin beharreko ordainagiriak zuzen egitea; Udalak eta udal langileek ematen dituzten zerbitzuen ebaluazioa eta herritarren gogobetetzea neurtzea helburu duen ikerketa bat egitea; kudeaketa gardena egitea, aurrekontuak, langileen zein kudeatzaileen soldatak argitaratuz.

«Aitzakia hutsak»

Udal gobernuak EAJ taldeak egindako proposamenei emandako eran-tzunak «aitzakia hutsak izan dira, gehienetan ezetz borobil batekin jantziak».

Bada, era berean, «azpimarratu beharreko ezetz borobil bat: Eudelek egindako gomendioei emandakoa». Udal gobernuak, Eudeleko kide izan arren, «ez du Eudelen gomendiorik bete» argudiatu dute jeltzaleek. Ondorioz, udal taldeei «legalki dagokien diruaren banaketa EH Bilduren mesedetan jarri du eta, nahita, kalte egin dio EAJri» gaineratu dute. «Gaur eta hemen kosta egiten zaigu udal gobernuaren jarrera ezkorra ulertzea. Nola da posible neurri aurrerakoiak onartu eta aurrekontuan jaso beharrean, horiei bizkarra ematea?» galdetzen dute EAJko zinegotziek. Udal gobernuko kideengan ikusitako «jarrera ezkorra ikusi ondoren», EAJren udal taldeak ezetza eman zion martxoaren 30eko osoko bilkuran udal gobernuak aurkeztutako aurrekontu-proposamenari.

Recibe nuestras newsletters en tu email

Apúntate