Diario Vasco

Jostailu Truke merkaturako produktuak hasiko dira jasotzen Arimazubi plazan

Azken urteotan egin izan duen bezala Txatxilipurdi Elkarteak Jostailu Truke Merkatua aurrera eramango du aurten ere.

Arrasateko erdigune eta auzoetako txoko ezberdinetan jostailuak batuko dituzte 9 egunetan zehar. Gaur bertan ekingo diote jostailuak biltzeari Arimazubi plazan arratsaldeko 17:30etik 19:00etara bitartean. Datozen egunetan jostailu bilketak ondorengo lekuetan egingo da: Santamaina plazan (eguena 24), Herriko plazan (egubakoitza 25), Okendo ludotekan (martitzena 29), San Antolin parkean (eguaztena 30) eta Usaetxe ludotekan (eguena 1).

Abenduaren 17an

Jostailuak egoera onean egotea da eskatzen den ezaugarrietako bat, izan ere, beste bat hartzera goazenean, egoera onean dagoena gustatuko bailitzaiguke har-tzea denoi.

Bestalde, sexu bereizketa egiten duten jostailuak edo eta indarkeriaren aldeko jarrera erakusten dutenak, ez dituzte onartuko.

Esan beharrik ez da, jostailuen balioa bakoitzaren gustuen eta erabileraren arabera neurtzen dela, beraz, jostailu guztiek balio bera izango dute eta jostailu bakoitzeko, truke txartel bat jasotzeko aukera egongo da.

Truke txartel horrekin, abenduaren 17an, Biterin jarriko dituzten jasotako jostailu guztien artean, beste bat hartzeko aukera egongo da. Goizeko 11:00etatik 13:00etara bitartean egongo da aukera hau, beti ere, aurrez txartela izanez gero. Egunean bertan, momentuan sortutako jostailuak trukatzeko aukera egongo da, baina ez etxetik ekarritakoak, ezin baitute ziurtatu osorik dauden edo ez. Hau horrela izanik, etxeko armairu eta apalak aztertu eta erabiltzen ez diren jostailuei beste erabilera bat ematera animatu nahi dituzte Arrasateko haur eta gazteak.

Recibe nuestras newsletters en tu email

Apúntate