Diario Vasco

Jose Mari Velezek eta Joseba Azkarragak 'Lurgorri' gogora ekarriko dute Aramaion

Joan den urriaren 29an Jose Mari Azkarraga Mozo 'Lurgorri'ren jaiotzaren mendeurrena bete zela eta, Aramaioko Udalak hitzaldi bat antolatu du errenteriarra jaiotzez baina Aramaion hazitako politikari, idazle eta euskaltzale honi buruz.

Berbaldiaren izenburua hau da: 'Jose Mari Azkarraga Mozo 'Lurgorri': zein izan zen Lurgorri? Zein harreman izan zuen Aramaiorekin?' eta hizlariak Josemari Velez de Mendizabal idazlea eta Joseba Azkarraga politikari ohia izango. Biak ala biak, Lurgorriren senideak.

Hitzaldia Aramaioko Kultura Etxean izango da, datorren asteazkenean, azaroak 9, arratsaldeko 6.30etik aurrera.

Errenterian jaio bazen ere, 'Lurgorri'k barru-barrutik maitatu zituen Aramaio eta aramaioarrak. Aramaion egindako egotaldiei esker, euskal kontuetarako grina sortu zitzaion bere buru-bihotzean. Madrilen zuzenbide-ikasketak egiten ari zela sartu zen Euzko Ikasle Batzan; lasterrera, faxisten matxinadari aurre eginez, Euskadiren askatasun demokratikoaren alde jarri zen. Horren ondorioz, heriotza-zigorra jaso zuen eta 1937ko abenduaren 16an erail zuten. Bere azken berbak 'Gora Euskadi Askatuta' izan ziren.

'Lurgorri' ren bizitza laburra bezain emankorra izan zen: sindikatu-gizona, politikaria, euskaltzalea, kazetaria eta literaturagilea.

Aramaioko EAJ-PNV-k dei egiten die, Jose Mari Azkarraga 'Lurgorri'k «barru-barrutik desiratu eta nahi izan zuen euskal gizartearen alde dauden herritarrei» esandako hitzaldira joan daitezen datorren eguaztenean.

Recibe nuestras newsletters en tu email

Apúntate