Diario Vasco

Burdin Aroko herrixkaren bila Murugainen

Argibideak. Etor Telleria arkeologoa iazko bisita gidatuan.
Argibideak. Etor Telleria arkeologoa iazko bisita gidatuan. / OLIDEN
  • Bertan burutzen ari diren indusketetan fase berriari ekin diote Ondare Babeseko arkeologoek

  • 2011n bizileku baten zantzuak aurkitu zituzten eremua abiapuntu hartuta, zundaketa sare bat egingo dute

Ondare Babesa arkeologia enpresako ikertzaileak Murugaien dira berriro. Atzo astelehenean ekin zioten fase berri bati indusketetan. Burdin Aroko herrixkaren aztarnak ikertuko dituzte urrian zehar luzatuko diren lanetan. Jorratuko duten bigarren ikerketa lerroa 1936ko Gerra Zibilari dagokio.

Ondare Babesak 2011. urteaz geroztik Murugaingo Burdin Aroko herrixkan hainbat arkeologi jarduera burutu ditu. Arrasate eta Aramaioko Udalek bultzatuta, arkeologi kanpaina berria jarri du abian aipatu ikerketa lerroetan sakontzeko.

Murugaingo mendebaldeko mendi magala aztertu nahi da aurten, bertan bilduz ekinaldi honetako lan-indarrak, modu honetan orain arte haztatu gabeko sektore batean jar-tzen da interesa. Horrekin batera, aurtengo kanpainan herrixkaren hegoaldeko zonaldean jarraitzeaz gain (Araban), beste eremu berri bat ireki nahi da, mendiaren ekialdean.

Bertan orografia apur bat lauagoa gertatzen da eta 2011 urtean eremu lau honetan Burdin Aroari dagozkion bizileku baten zantzuak aurkitu ziren.

Hau abiapuntutzat hartuta, zundaketa sare bat proposatuko dute Ondare Babesako arkeologoek: neurri ezberdinetakoak izan daitezke baina beti ere modu sistematiko eta logiko batean eremu hau bere osotasunean beteko dutenak.

Auzolandegiak

Murugaingo ikerketa arkeologikoek, helburu zientifikoez gain, xede didaktikoa ere badute. Herritarren parte hartzea sustatu nahi da, ate irekien jardunaldiak planteatuz aurreko urteetan bezala, eta Aramaio, eta Arrasateko herritarrei irekitako auzolandegiak antolatu dira. Beti ere Arkeologoen gidaritzapean. Zehazki hilaren 15ean eta 22an egingo dira auzolandegiok.

Aurreko edizioetan bezala, herri hauetako bizilagunek parte-hartze aktiboa izatea espero da. Hilaren 30ean, berriz, bisita gidatua egingo da eta horrela emango zaio amaiera 2016ko fase honi.

Ekintza ireki hauetan parte har-tzeko asmoa duen edonork izena eman beharko du aldez aurretik, Aramaio edo Arrasateko udaletxera zuzenduta.

Egitasmoaren eta emaitzen dibulgazio lanak egingo dira. Modu honetan proiektua bistaratu eta Murugaingo espazioa, bisitariarentzat ezagutza gune bat bihurtzea litzateke azken helburua.

Zabalkunde lana hitzaldi bidez, tokiko komunikabideetan, bisitaldi gidatueta eta sare sozialetan egingo da.

Recibe nuestras newsletters en tu email

Apúntate