Alaitz Urkiolak eta Aingeru Castrok Euskadiko txapeldunen saria jaso dute

Alaitz Urkiola eta Aingeru Castro, euren sariekin atzo Zumaian. / SARA UTRERA
Alaitz Urkiola eta Aingeru Castro, euren sariekin atzo Zumaian. / SARA UTRERA

Errepide rallyetako garaile bezala hartu zituzten aintzat Zumaian atzo ospatutako festan

JOSEBA LEZETA ANTZUOLA.

Alaitz Urkiola kopilotu antzuolarrak eta bere gidari Aingeru Castrok azken Euskadiko errepide rallyetako garaile bezala irabazitako saria jaso zuten atzo Zumaian Euskal Automobilismo Federazioak antolatutako jaian. Bere BMW M3 autoarekin denboraldi polita burutu du Castro-Urkiola bikoteak. Izan ere, rallysprintetan bigarren geratu dira sailkapen nagusian.

Urteko kopiloturik onena izan da Alaitz Urkiola 121 punturekin. Alde handia, 53koa, atera dio Larraitz Etxeberria bigarrenari. Mikel Arzak osatu du podiuma 65era. Estuago ibili zen Urkiola rallysprintetan eta azkenik aurrea hartu zion Anartz Onaindiak.

Zumaiako Maria eta Jose ikastetxean egin zen atzo gidari eta kopilotuen festa. Ehun bat sari banatu zituzten guztira. Espainia zein nazioartean emaitza onak eskuratu dituztenak ere han izan ziren euskal txapelketen garaileekin batera.

Sari banaketaren ondoren, luntxa dastatu zuten joandako guztiek eta urtean izandako gorabeherei zein aurtengo egitasmoei buruz giro onean hitz egiteko aukera izan zuten.

Castro eta Urkiolaz gain, hona beste irabazleen zerrenda: Unai Arregi-Sergio Gil (lur gaineko rallyetan); Enrike Barrenetxea Arando-Anartz Onaindia (rallysprintean); Asier Santamaría-Isaías Bringas (sport erregulartasunean); Aitor Zabaleta eserleku bakarretakoetan eta Bruno Scherer turismoetan (mendian); eta Raúl Pérez (slalomean).

Contenido Patrocinado

Fotos

Vídeos