Diario Vasco

Hiru antzuolar, hamar aurrenekoetan Espainiako bizikleta jaitsiera txapelketan

Larrea, Fernandez eta Castro, Euskadiko selekzioko kideekin eta Espainiako txapeldunarekin.
Larrea, Fernandez eta Castro, Euskadiko selekzioko kideekin eta Espainiako txapeldunarekin. / FERNAN
  • Unai Larrea juniorra seigarren sailkatu da Ubriquen; Jon Fernandez kadetea, zortzigarren; eta Manu Castro masterra, hamargarren

Espainiako BTT txapelketan emaitza politak lortu dituzte antzuolarrek asteburu honetan Cádizko Ubrique herrian. Mendi bizikleta jaitsieretan diharduten hirurak sailkatu dira hamar aurrenekoetan, bakoitza bere mailan. Bero ikaragarria izan zuten parte-har-tzaileek zapatuan zein domekan.

Unai Larreak seigarren bukatu zuen juniorretan minutu bat eta 57 segundoko denborarekin. Zortzi segundo atera zizkion irabazleak, Jorba Prats kataluniarrak. Kadeteetan, hamargarren egin zuen Jon Fernandezek, bi minutu eta hiru segundotan. Garaipena Edgar Peyra kataluniarrarentzat izan zen. Bederatzi segundo azkarrago jaitsi zen.

Manu Castro master 30 mailan aritu zen. Hamargarren denborarik onena izan zen berea: bi minutu eta bederatzi segundokoa. Hamazazpi segundo atera zizkion aurrenekoak.

Euskadiko selekzioko kide bezala joan ziren Ubriquera Unai Larrea zein Jon Fernandez eta euren taldeko ordezkaririk onenak izan ziren, bakoitza bere mailan.

Iraitz Etxebarria bizkaitarra nagusitu zen maila nagusian, elitean. Betibehera klubeko laguna izan zen guztietan azkarrena: minutu bat, 42 segundo eta 863 milaren. Ospakizunerako arrazoirik bazen proba bukatu ostean.

Antzuolako jaitsiera prestatzeari ekin beharko diote Unai Larreak, Jon Fernandezek eta Manu Castrok. Uztailaren 8an jokatuko da Pagamendi ingurutik trenbidera bitartean. Baliteke beste antzuolarren bat ere tartean izatea zapatu horretan. Azken asteotan entrenatu eta ibilbidea ezagutzera kanpotik etorritako ere badira.

Recibe nuestras newsletters en tu email

Apúntate