Diario Vasco

Zortzi Milietan parte hartzeko 244 mendi korrikalarik eman dute izena

Jon Iturbe antzuolarra berriz izango da Zortzi Miliak probako parte-hartzaileen artean.
Jon Iturbe antzuolarra berriz izango da Zortzi Miliak probako parte-hartzaileen artean. / ALBERDI
  • Bosgarren eta azken aldiz jokatuko da datorren domeka goizean

Berrehun lagundik gora bilduko ditu Antzuola Zortzi Miliak mendi lasterketak datorren domeka goizean. Dagoeneko 244 gizon-emakumek eman dute izena parte hartzeko. Ikusi egin beharko da azken orduan zenbatek atzera egin duten, baina kopuru horren inguruan ibiliko da hamar eta erdietan Herriko Plazatik irtengo den tropela. Puntu gorena Irimoko tontorrean duen 13,360 kilometroko ibilbide gogorra izango dute zain.

Hamasei urtetik gorakoek dute parte hartzeko aukera. Korrikalari zerrendan hamabi antzuolar ageri dira, hamaika mutil eta neska bat. Tartean da, esate batera, azken urteotan hain emaitza bikainak lortu dituen Jon Iturbe. Bigarren sailkatu da aurreko bi edizioetan. Ordubetetik minutu gutxi batzuk gora ibiltzen dira azkarrenak helmugan.

Ibilbideak ez du aldaketa nabarmenik. Herriko Plazatik irten, Irimoegi auzoan gora hartu, trenbidetik Boton aldera joan, handik Irimo gainera igo eta handik beherako bidea hartzen dute, Trekuztik berriz Irimoegin sartuz. Lehenengo erdian hauspoa berotu eta bigarrenean ahalik eta azkarren jaisten dira herrigunera heldu arte. Olaran ondoan jartzen dute helmuga.

Bosgarren edizioa duten aurten Zortzi Miliek. Azkena dela iragarri dute antolatzaileek. Datozen hilabeteetan aldaketarik ez bada edota beste norbaitek ardura bere gain hartzen ez badu, badirudi ez dela berriz egingo Antzuolan.

Recibe nuestras newsletters en tu email

Apúntate