Diario Vasco

Euskararen erabilera %65ekoa da, duela sei urteko bera

Antzuolan euskara zenbateraino erabiltzen den neurtu dute.
Antzuolan euskara zenbateraino erabiltzen den neurtu dute. / OLIDEN
  • Umeen artean gutxiago hitz egiten dela antzeman du azken kale neurketak

Duela sei urteko bera da euskararen erabilera Antzuolan, hau da, %65ekoa. Soziolinguista Klusterra arduratu da kale neurketaz. Udalak datuak behar zituen bere usteak benetakoak ziren ala ez baieztatzeko zein herrian zenbat euskara hitz egiten den jakiteko.

Elebakar kopurua kontuan hartuta, normaltzat jotzen da portzentaia hori. Aldiz, kezka handiagoa eragin du neska-mutikoen artean euskaraz gutxiago egiten dela konturatzeak.

Aurreko astean izan zuen aurkezpenean zera azaldu zuen Jon Ugarteburu zinegotziak honi buruz: «Erabilera orokorrean ez da egon jaitsierarik, baina bai gazteenean eta umeenean. Batez ere gazteen artean hamar bat puntu jaitsi da eta umeen artean, berriz, bi».

Haurrak ondoan dituztenean aita-amek euskaraz gehiago aritzen direla bistaratu du baita neurketak. Alderantziz ere gertatzen da: umerik tartean ez denean, gaztelania nagusi.

Ezaguera handiagoa izanik, ondorio hauek jarri zituen mahai gainean Ugarteburuk: «Ez da hain normala atzetik datozenen erabilera, ezaguera berez %100 inguruan izanda %80 inguruan egotea euskararen erabilera. Ezaguera azkenean garrantzitsua da. Helduetan ezaguera eza ere badago. Beraz, normalagotzat hartzen dut erabilera ez izatea hain altua haien artean».

Neurriak hartuko dira. UEMAk bultzatutako arnas-guneetako tailerrak egin ziren eta jarraipena eman nahi diete. Eskola kirolarekin, guraso elkartearekin eta aisialdi taldeekin lanean segitzeko asmoa erakutsi du Udalak.

Helduei begira, bestalde, tailerrak antolatzea azter dezakete. Dena den, asmoa baino ez da oraingoz.

Hitzaldia Arrasaten

Gazteei zuzenduta, lana lortzeko dauden bideen berri emango duen hitzaldia izango da gaur goizeko hamarretan Debagoieneko Mankomunitateak Arrasateko Nafarroa etorbidean duen egoitzan. 'Ikasketak bukatuta, lanik ezin aurkitu' du izenburua.

Antzuolarrak ere gonbidatuta daude, euskaldeko herri guztietako gazteak bezala. Hazilan Debagoiena proiektuan parte hartzeko, berriz, datorren eguaztena da azken eguna (943-793090).

Recibe nuestras newsletters en tu email

Apúntate